న్యూరాలింక్‌కు సవాల్ విసురుతున్న చైనా 'బ్రెయిన్‌కో'..

చైనాకు చెందిన న్యూరోటెక్నాలజీ స్టార్టప్ బ్రెయిన్‌కో (BrainCo), ఎలాన్ మస్క్ సంస్థ న్యూరాలింక్ (Neuralink)కు గట్టి పోటీగా నిలుస్తోంది. మెదడులో చిప్ అమర్చే శస్త్రచికిత్స అవసరం లేకుండానే పనిచేసే నాన్-ఇన్వేసివ్ బ్రెయిన్-కంప్యూటర్ ఇంటర్‌ఫేస్ (BCI) పరికరాలను అభివృద్ధి చేస్తోంది. 2015లో హార్వర్డ్ ఇన్నోవేషన్ ల్యాబ్స్ నుంచి ప్రారంభమైన ఈ సంస్థ బయోనిక్ చేతులు, నిద్రకు సహాయపడే పరికరాలు, ADHD, ఆటిజం, నిద్రలేమి వంటి న్యూరోలాజికల్ సమస్యలకు ఉపయోగపడే బీసీఐ హెడ్‌సెట్లను రూపొందించింది. అలాగే బరువు నియంత్రణకు ఉపయోగపడే కొత్త బీసీఐ చికిత్సను కూడా అభివృద్ధి చేస్తోంది.

ఇటీవల బ్రెయిన్‌కో 2 బిలియన్ యువాన్ (సుమారు 280 మిలియన్ డాలర్లు) నిధులను సమీకరించింది. మెదడు సంకేతాలను ఖచ్చితంగా గుర్తించేందుకు ప్రత్యేక సెన్సర్లు, కృత్రిమ మేధస్సు (AI) ఆధారిత అల్గోరిథమ్‌లను ఉపయోగిస్తోంది. భవిష్యత్తులో వినియోగదారుల ఎలక్ట్రానిక్ ఉత్పత్తుల్లోకి విస్తరించడంతో పాటు ఇతర సంస్థలకు తన బీసీఐ ప్లాట్‌ఫారమ్‌ను లైసెన్స్ ఇవ్వాలని లక్ష్యంగా పెట్టుకుంది. బ్రెయిన్‌కోతో పాటు స్టెయిర్‌మెడ్, న్యూరోఎక్స్‌ఎస్, గెస్టాలా వంటి సంస్థలు కూడా బీసీఐ రంగంలో ముందుకు సాగుతుండగా, చైనా ప్రభుత్వం ఈ రంగాన్ని వ్యూహాత్మక భవిష్యత్ పరిశ్రమగా గుర్తించి భారీ ప్రోత్సాహం అందిస్తోంది.