క్వాంటమ్‌స్కేప్ సీఈఓతో డిప్యూటీ సీఎం భేటీ.. నెక్స్ట్‌జెన్ బ్యాటరీలపై చర్చ

డిప్యూటీ సీఎం శాన్‌జోస్‌లోని క్వాంటమ్‌స్కేప్ ప్రధాన కార్యాలయాన్ని సందర్శించారు. సంస్థ ప్రెసిడెంట్, సీఈఓ డా. శివ శివరామ్‌తో పాటు సీనియర్ నాయకత్వ బృందంతో సమావేశమయ్యారు. ఈ సందర్భంగా సాలిడ్-స్టేట్ లిథియం-మెటల్ బ్యాటరీ టెక్నాలజీపై డా. శివరామ్ వివరించారు. సంప్రదాయ లిథియం-అయాన్ బ్యాటరీలతో పోలిస్తే అధిక ఎనర్జీ డెన్సిటీ, వేగవంతమైన ఛార్జింగ్, మెరుగైన భద్రత వంటి అవకాశాలతో పాటు పరిశోధన నుంచి వాణిజ్య స్థాయి తయారీకి మారే క్రమంలో ఎదురయ్యే సవాళ్లను వివరించారు.

ప్రపంచ బ్యాటరీ సరఫరా వ్యవస్థలో కీలక ఖనిజాలు, అధునాతన మెటీరియల్స్, విడిభాగాలు, బ్యాటరీ సెల్ తయారీ, ఎలక్ట్రిక్ వాహనాల అనుసంధానం వంటి అంశాలపై కూడా చర్చ జరిగింది. భారత్‌లో అభివృద్ధి చెందుతున్న అధునాతన తయారీ, ఇంజినీరింగ్ ప్రతిభ, క్లీన్ టెక్నాలజీ రంగాల గురించి డిప్యూటీ సీఎం వివరించారు. పరిశోధన, అధునాతన మెటీరియల్స్, సరఫరా భాగస్వామ్యాలు, భవిష్యత్తులో భారత్‌లో నెక్స్ట్-జెన్ బ్యాటరీ టెక్నాలజీల స్థానికీకరణ లేదా విస్తరణ వంటి అవకాశాలను పరిశీలించాలని క్వాంటమ్‌స్కేప్‌ను ఆహ్వానించారు.