టాటా ఏరిస్ బిల్డ్ క్వాలిటీకి అదిరిపోయే టెస్ట్.. హారియర్ ఈవీతో డెమో!

టాటా మోటార్స్ తన కొత్త ఏరిస్ సెడాన్ నిర్మాణ పటిష్టతను ప్రత్యేకమైన డెమో ద్వారా ప్రదర్శించింది. ఇందులో సుమారు 2,300 కిలోల బరువున్న టాటా హారియర్ ఈవీని ఏరిస్ కారుపై ఉంచారు. ఈ ప్రదర్శన ద్వారా సెడాన్ స్ట్రక్చరల్ స్ట్రెంగ్త్, డ్యూరబిలిటీ, బిల్డ్ క్వాలిటీపై కంపెనీ దృష్టిని వెల్లడించింది. భద్రతకు ప్రాధాన్యతనిస్తూ పటిష్టమైన నిర్మాణాన్ని అందించడమే లక్ష్యంగా ఈ డెమో నిర్వహించినట్లు తెలుస్తోంది.

టాటా మోటార్స్ లైనప్‌లో టిగోర్ స్థానాన్ని ఏరిస్ భర్తీ చేసే అవకాశం ఉంది. కొత్త సెడాన్‌కు అప్‌డేటెడ్ డిజైన్, స్టైలింగ్ మార్పులు ఉండనున్నట్లు సమాచారం. మారుతి సుజుకి డిజైర్, హ్యుందాయ్ ఆరా వంటి ప్రముఖ కాంపాక్ట్ సెడాన్లకు ఏరిస్ పోటీ ఇవ్వనుంది. పెట్రోల్‌తో పాటు సీఎన్‌జీ పవర్‌ట్రెయిన్ ఆప్షన్లు కూడా అందుబాటులో ఉండే అవకాశం ఉంది.