బాండ్‌ ఈల్డ్స్‌తో మార్కెట్లకు కొత్త టెన్షన్‌.. అసలు కారణాలివే!

పశ్చిమాసియా ఉద్రిక్తతలు, పెరుగుతున్న క్రూడాయిల్‌ ధరలు ఇప్పటికే దేశీయ స్టాక్‌ మార్కెట్లపై ఒత్తిడి పెంచుతున్నాయి. తాజాగా అమెరికా ట్రెజరీ బాండ్లపై పెరుగుతున్న రాబడులు కూడా మార్కెట్లకు మరో సవాలుగా మారాయి. గత ఎనిమిది వారాల్లో సెన్సెక్స్‌ 6,590 పాయింట్లు, నిఫ్టీ 2,149 పాయింట్లు నష్టపోగా.. బీఎస్‌ఈ మార్కెట్‌ క్యాపిటలైజేషన్‌లో రూ.26 లక్షల కోట్లకు పైగా సంపద ఆవిరైంది. అమెరికా 10 ఏళ్ల ట్రెజరీ ఈల్డ్‌ 5.31 శాతానికి చేరగా, 30 ఏళ్ల బాండ్‌ ఈల్డ్‌ 5.65 శాతాన్ని దాటింది. ఇవి వరుసగా 2007, 2002 తర్వాత అత్యధిక స్థాయిలకు చేరినట్లు తాజా నివేదికలు పేర్కొంటున్నాయి.

బాండ్‌ ఈల్డ్స్‌ పెరగడానికి అమెరికాలో ద్రవ్యోల్బణంపై ఆందోళనలు, అధిక చమురు ధరలు, వడ్డీ రేట్లపై అంచనాలు, భారీ ప్రభుత్వ రుణ అవసరాలు ప్రధాన కారణాలుగా ఉన్నాయి. అంతేకాకుండా ఏఐ మౌలిక సదుపాయాల కోసం టెక్‌ కంపెనీలు భారీగా రుణాలు సమీకరిస్తుండటం కూడా దీర్ఘకాలిక బాండ్‌ ఈల్డ్స్‌పై ప్రభావం చూపుతోంది. అమెరికా బాండ్లలో రాబడులు ఆకర్షణీయంగా మారడంతో విదేశీ ఇన్వెస్టర్లు భారత్‌ వంటి అభివృద్ధి చెందుతున్న మార్కెట్ల నుంచి నిధులను ఉపసంహరించుకునే అవకాశం పెరుగుతుంది. దీనికి తోడు డాలర్‌ బలపడటం, రూపాయి విలువపై ఒత్తిడి, అధిక ఈల్డ్స్‌ కారణంగా ఈక్విటీల విలువలు తగ్గే పరిస్థితి కూడా మార్కెట్లపై ప్రభావం చూపుతోంది. ఈ నేపథ్యంలో సెప్టెంబర్‌లో విదేశీ పోర్ట్‌ఫోలియో ఇన్వెస్టర్లు భారత ఈక్విటీల నుంచి రూ.35,861 కోట్ల నికర పెట్టుబడులను వెనక్కి తీసుకున్నారు.