ఉద్యోగుల తొలగింపులకు సిద్ధమవుతున్న నెట్‌ఫ్లిక్స్‌?

ప్రముఖ స్ట్రీమింగ్ సంస్థ నెట్‌ఫ్లిక్స్‌ భారీగా ఉద్యోగులను తొలగించేందుకు సిద్ధమవుతున్నట్లు ఓ మీడియా సంస్థ కథనం వెల్లడించింది. కంపెనీ మొత్తం ఉద్యోగుల్లో 5 శాతం మంది, అంటే సుమారు 800 మందిని తొలగించే అవకాశం ఉందని నివేదిక పేర్కొంది. సంస్థ పునర్నిర్మాణంలో భాగంగా ఈ నిర్ణయం తీసుకున్నట్లు సమాచారం. మరో రెండు, మూడు రోజుల్లో ఉద్యోగాల కోత ప్రారంభమయ్యే అవకాశం ఉన్నప్పటికీ, దీనిపై నెట్‌ఫ్లిక్స్‌ అధికారికంగా స్పందించలేదు. ఏ విభాగాల్లో ఎక్కువగా కోతలు ఉంటాయనే విషయంపై కూడా స్పష్టత లేదు. 2025 చివరి నాటికి కంపెనీలో సుమారు 16 వేల మంది పూర్తిస్థాయి ఉద్యోగులు ఉండగా, వారిలో దాదాపు 10,900 మంది అమెరికా, కెనడాలో పనిచేస్తున్నారు.

నెట్‌ఫ్లిక్స్‌ చివరిసారిగా 2022 మొదటి త్రైమాసికంలో భారీగా ఉద్యోగులను తొలగించింది. అప్పట్లో సుమారు రెండు లక్షల మంది చందాదారులను కోల్పోవడంతో 450 మందిని విధుల నుంచి తొలగించింది. ఆ తర్వాత కూడా సంస్థ క్రమంగా ఉద్యోగాల కోతలు చేపడుతూ వచ్చింది. ఈ ఏడాది ఆరంభంలోనూ డజన్ల సంఖ్యలో ఉద్యోగులను తొలగించినట్లు సమాచారం. మరోవైపు, మార్కెట్‌లో కంపెనీ వృద్ధి కొనసాగుతున్నప్పటికీ ఈ తాజా లేఆఫ్‌ల వార్త వెలువడింది. రెండో త్రైమాసికంలో అన్ని భౌగోళిక మార్కెట్లలో రెండంకెల వృద్ధిని నమోదు చేసినట్లు నెట్‌ఫ్లిక్స్‌ కో-సీఈఓ టెడ్‌ సారండోస్ గత నెలలో తెలిపారు. అయితే, తాము ఆశించిన వేగంతో కంపెనీ విస్తరించడం లేదని ఆయన పేర్కొన్నారు.