భారత రక్షణ రంగంలో మరో భారీ ఒప్పందం..

భారత వాయుసేనకు మరింత అధునాతన ఆయుధ సామర్థ్యాన్ని అందించేందుకు రక్షణ శాఖ కీలక ఒప్పందం కుదుర్చుకుంది. 160 శాటిలైట్ స్మార్ట్ యాంటీ-ఎయిర్‌ఫీల్డ్ వెపన్స్ (SAT-SAAW), అనుబంధ పరికరాల కొనుగోలుకు భారత్ డైనమిక్స్ లిమిటెడ్ (BDL)తో రూ.810.79 కోట్ల విలువైన ఒప్పందంపై రక్షణ శాఖ సంతకం చేసింది. సెప్టెంబర్ 23న రక్షణ శాఖ కార్యదర్శి రాజేశ్ కుమార్ సింగ్ సమక్షంలో ఈ ఒప్పందం జరిగింది. ఈ ఆయుధాలను డీఆర్‌డీవో స్వదేశీగా అభివృద్ధి చేయగా, బీడీఎల్ ఉత్పత్తి చేయనుంది.

SAT-SAAW ఒక ఎయిర్‌-టు-గ్రౌండ్ ప్రిసిషన్‌-గైడెడ్ గ్లైడ్ ఆయుధ వ్యవస్థ. దీనిని జాగ్వార్, హాక్, సుఖోయ్-30 ఎంకేఐ వంటి యుద్ధ విమానాల నుంచి ప్రయోగించవచ్చు. సుదూర స్టాండ్‌ఆఫ్‌ రేంజ్‌ నుంచి శత్రు ఎయిర్‌ఫీల్డ్‌లను లక్ష్యంగా చేసుకునే సామర్థ్యం దీనికి ఉందని రక్షణ శాఖ తెలిపింది. ఈ ఆయుధాల సరఫరా 2027-28, 2028-29 ఆర్థిక సంవత్సరాల్లో జరగనుంది. ఈ వ్యవస్థలో 60 శాతం స్వదేశీ కంటెంట్ ఉండనుంది.