హైదరాబాద్‌లో మరో అంతర్జాతీయ సంస్థ భారీ పెట్టుబడులు

హైదరాబాద్‌లో మరో అంతర్జాతీయ సంస్థ తన గ్లోబల్ క్యాపబిలిటీ సెంటర్‌ (జీసీసీ)ను ఏర్పాటు చేసింది. అమెరికాలోని జార్జియా రాష్ట్రం కేంద్రంగా పనిచేస్తున్న ఎంటర్‌ప్రైజ్ డేటా ఇంటెలిజెన్స్ ప్లాట్‌ఫామ్ సంస్థ స్లాష్‌బీఐ (SplashBI) ఈ కేంద్రాన్ని ప్రారంభించింది. తెలంగాణ ఐటీ, పరిశ్రమల శాఖ మంత్రి డి. శ్రీధర్ బాబు సోమవారం ఈ జీసీసీని ప్రారంభించారు. సుమారు 20 వేల చదరపు అడుగుల విస్తీర్ణంలో ఈ కేంద్రాన్ని ఏర్పాటు చేశారు. 2014 నుంచే స్లాష్‌బీఐ హైదరాబాద్‌లో కార్యకలాపాలు నిర్వహిస్తోంది. కొత్త కేంద్రం ద్వారా నగరంలో తన కార్యకలాపాలను మరింత విస్తరించాలని సంస్థ భావిస్తోంది.

వచ్చే ఐదు నుంచి ఏడేళ్లలో ఈ కేంద్రం అభివృద్ధి, విస్తరణ కోసం 100 మిలియన్ డాలర్లకు పైగా పెట్టుబడి పెట్టనున్నట్లు స్లాష్‌బీఐ ప్రకటించింది. ఈ పెట్టుబడితో హైదరాబాద్‌లో తన కార్యకలాపాలను మరింత బలోపేతం చేయాలని సంస్థ లక్ష్యంగా పెట్టుకుంది. అంతర్జాతీయ కంపెనీలు తమ సాంకేతిక, డేటా, వ్యాపార కార్యకలాపాల కోసం హైదరాబాద్‌ను ఎంచుకుంటున్నాయనడానికి ఈ పరిణామం మరో ఉదాహరణగా నిలుస్తోంది. ఇప్పటికే పలు ప్రముఖ సంస్థలకు కేంద్రంగా ఉన్న హైదరాబాద్‌లో మరో అంతర్జాతీయ సంస్థ జీసీసీ ఏర్పాటు కావడం నగర ఐటీ రంగానికి మరింత ప్రాధాన్యతను తీసుకొస్తోంది.