విప్రోలో కొత్త బెంచ్‌ పాలసీ.. జూనియర్, మిడ్‌ లెవల్‌ ఉద్యోగులకు భారీ ఊరట

పలు ఐటీ కంపెనీలు ఉద్యోగుల బెంచ్‌ సమయాన్ని తగ్గిస్తున్న నేపథ్యంలో విప్రో మాత్రం భిన్నమైన విధానాన్ని అమల్లోకి తెచ్చింది. అక్టోబర్‌ 1 నుంచి బ్యాండ్‌ 2, అంతకంటే తక్కువ స్థాయి జూనియర్‌, మిడ్‌ లెవల్‌ ఉద్యోగులు గరిష్ఠంగా 180 క్యాలెండర్‌ రోజుల వరకు బెంచ్‌పై ఉండేందుకు కొత్త విధానం అవకాశం కల్పిస్తోంది. బిల్‌ చేయదగిన ప్రాజెక్టు నుంచి ఉద్యోగి విడుదలైన రోజు లేదా మరో బిల్‌ చేయదగిన ప్రాజెక్టు కేటాయింపు లేకుండా ఆన్‌సైట్‌ అసైన్‌మెంట్‌ నుంచి భారత్‌కు తిరిగి వచ్చిన రోజు నుంచి ఈ వ్యవధి లెక్కించనున్నారు. 180 రోజుల్లోపు ప్రాజెక్టు కేటాయింపు పొందని ఉద్యోగులపై కంపెనీ నిబంధనల ప్రకారం చర్యలు తీసుకునే అవకాశం ఉంది.

ఈ మార్పు ద్వారా ప్రాజెక్టు లేని ఉద్యోగులకు నైపుణ్యాలను పెంచుకునేందుకు, సంస్థలోని ఇతర ప్రాజెక్టులకు మారేందుకు మరింత సమయం లభించనుంది. కొత్త ఉద్యోగులను నియమించి శిక్షణ ఇవ్వడం కంటే ఇప్పటికే ఉన్న సిబ్బందిని అవసరమైన ప్రాజెక్టులకు వినియోగించుకోవడానికి ఇది దోహదపడవచ్చని పరిశ్రమ వర్గాలు చెబుతున్నాయి. ఇదే సమయంలో, ఇతర ఐటీ సంస్థలు బెంచ్‌ సమయాన్ని కుదిస్తున్నాయి. టీసీఎస్‌ విధానం ప్రకారం ఉద్యోగులు ఏడాదిలో కనీసం 225 రోజులు బిల్‌ చేయదగిన ప్రాజెక్టుల్లో ఉండాలి, దీంతో బెంచ్‌ సమయం 35 పని దినాలకు పరిమితమవుతోంది. విప్రోలో కొందరు ఉద్యోగులు ఎక్స్‌టెండెడ్‌ బెంచ్‌ లీవ్‌ ప్రోగ్రామ్‌కు సంబంధించి కార్మిక కమిషనర్‌ను ఆశ్రయించినట్లు కూడా సమాచారం.