ఒరాకిల్‌లో మళ్లీ ‘6AM’ లేఆఫ్స్‌ మెయిల్స్‌..

ఒరాకిల్‌లో మరో విడత ఉద్యోగ కోతలు ప్రారంభమయ్యాయి. సెప్టెంబర్‌ 14న కొందరు ఉద్యోగులకు తెల్లవారుజామునే ‘6 AM’ మెయిల్స్‌ అందాయి. సంస్థాగత మార్పుల్లో భాగంగా తమ పోస్టులను తొలగిస్తున్నట్లు ఆ మెయిల్స్‌లో పేర్కొన్నట్లు ఉద్యోగులు వెల్లడించారు. ప్రభావిత ఉద్యోగులు లింక్డ్‌ఇన్‌, రెడిట్‌, బ్లైండ్‌ వంటి సోషల్‌ మీడియా వేదికల్లో తమ అనుభవాలను పంచుకుంటున్నారు. తాజా విడతలో ఎంతమంది ఉద్యోగులు ప్రభావితమయ్యారనే విషయాన్ని ఒరాకిల్‌ అధికారికంగా వెల్లడించలేదు. అయితే 2026లో ఇప్పటికే సుమారు 21 వేల ఉద్యోగాలను సంస్థ తొలగించింది.

మరోవైపు, ఉద్యోగుల సంఖ్యను తగ్గిస్తున్న సమయంలోనే ఒరాకిల్‌ ఆర్టిఫిషియల్‌ ఇంటెలిజెన్స్‌, క్లౌడ్‌ మౌలిక సదుపాయాలపై భారీగా పెట్టుబడులు పెడుతోంది. 2027 ఆర్థిక సంవత్సరం తొలి త్రైమాసికంలో కంపెనీ క్యాపిటల్‌ ఎక్స్‌పెండిచర్‌ $28.5 బిలియన్లకు చేరింది. గత ఏడాది ఇదే త్రైమాసికంలో ఇది $8.5 బిలియన్లుగా ఉండటం గమనార్హం. ఇదే సమయంలో $30 బిలియన్లకు పైగా కొత్త AI క్లౌడ్‌ కాంట్రాక్టులు కుదుర్చుకోవడంతో కంపెనీ మిగిలిన పనితీరు బాధ్యతలు (RPO) $664 బిలియన్లకు చేరాయి. పూర్తి ఆర్థిక సంవత్సరానికి $90-95 బిలియన్ల స్థాయిలో మూలధన వ్యయాన్ని కొనసాగించనున్నట్లు ఒరాకిల్‌ తెలిపింది.