ఆల్ఫాబెట్‌కు భారీ షాక్.. ఒక్కరోజే 500 బిలియన్ డాలర్లు ఆవిరి!

టెక్ దిగ్గజం గూగుల్ మాతృసంస్థ ఆల్ఫాబెట్ షేర్లు గురువారం భారీగా పతనమయ్యాయి. దీంతో కంపెనీ మార్కెట్ విలువ ఒక్కరోజులోనే సుమారు 500 బిలియన్ డాలర్లు (రూ.47 లక్షల కోట్లకు పైగా) ఆవిరైంది. ఆర్టిఫిషియల్ ఇంటెలిజెన్స్ (ఏఐ) రంగంలో భారీగా పెట్టుబడులు పెడుతున్నప్పటికీ, వాటి ద్వారా ఆశించిన స్థాయిలో లాభాలు ఎప్పుడు వస్తాయనే విషయంలో ఇన్వెస్టర్లలో సందిగ్ధత నెలకొంది. మరోవైపు ఏఐ ఆధారిత సెర్చ్ సేవల విస్తరణతో గూగుల్ ప్రకటనల ఆదాయానికి గండిపడే అవకాశం ఉందనే ఆందోళనలు పెరిగాయి. చాట్‌జీపీటీ, క్లాడ్ వంటి ఏఐ చాట్‌బాట్‌ల వినియోగం పెరుగుతుండటంతో గూగుల్ సెర్చ్ ఆధిపత్యం తగ్గవచ్చనే అంచనాలు కూడా షేర్ల పతనానికి కారణమయ్యాయి. దీంతో కంపెనీ మార్కెట్ విలువ 3.97 ట్రిలియన్ డాలర్ల నుంచి 3.46 ట్రిలియన్ డాలర్లకు పడిపోయింది.

ఇటీవల ప్రకటించిన మూడో త్రైమాసిక ఫలితాలు కూడా ఇన్వెస్టర్ల అంచనాలను అందుకోలేకపోయాయి. ఈ త్రైమాసికంలో ఆల్ఫాబెట్ 127.6 బిలియన్ డాలర్ల ఆదాయాన్ని నమోదు చేసినప్పటికీ, వాల్‌స్ట్రీట్ విశ్లేషకుల అంచనాలను అధిగమించలేకపోయింది. మరోవైపు డేటా సెంటర్లు, ఏఐ చిప్స్ వంటి మౌలిక సదుపాయాల అభివృద్ధికి గూగుల్ భారీగా ఖర్చు చేస్తోంది. భవిష్యత్తులో ఈ వ్యయాలు మరింత పెరిగే అవకాశం ఉందని కంపెనీ సంకేతాలివ్వడంతో స్వల్పకాలిక లాభాలపై సందేహాలు వ్యక్తమవుతున్నాయి. పెరుగుతున్న పెట్టుబడులు, తగ్గుతున్న ఫ్రీ క్యాష్ ఫ్లో, ఏఐ రంగంలో పోటీ వంటి అంశాలు ఇన్వెస్టర్లను ఆందోళనకు గురిచేస్తున్నాయి. ఈ పరిణామాలతో పలువురు ఇన్వెస్టర్లు షేర్ల విక్రయాలకు మొగ్గుచూపడంతో ఆల్ఫాబెట్ స్టాక్ ఆరు నెలల కనిష్ఠానికి చేరుకుంది.