భారత్ మొబిలిటీ ఎక్స్‌పో 2027లో కార్ల ప్రియులకు భారీ ట్రీట్

కొత్త సంవత్సరం ప్రారంభమవుతుందంటే ఆటోమొబైల్ రంగంలోనూ కొత్త మోడళ్లు, ఆధునిక టెక్నాలజీతో సందడి మొదలవుతుంది. భవిష్యత్తులో మార్కెట్లోకి రానున్న కార్లు, ఎలక్ట్రిక్ వాహనాలు, కాన్సెప్ట్ మోడళ్లను ప్రదర్శించేందుకు 2027 భారత్ మొబిలిటీ ఎక్స్‌పో వేదిక కానుంది. గతంలో ఆటో ఎక్స్‌పోగా పిలిచిన ఈ కార్యక్రమాన్ని ప్రస్తుతం భారత్ మొబిలిటీ ఎక్స్‌పో పేరుతో నిర్వహిస్తున్నారు. షెడ్యూల్ ప్రకారం, 2027 ఫిబ్రవరి 4 నుంచి 9 వరకు న్యూఢిల్లీలోని ప్రగతి మైదాన్‌లో ఉన్న భారత్ మండపంలో ఈ ఎక్స్‌పో జరగనుంది. ఫిబ్రవరి 2, 3 తేదీల్లో మీడియా కార్యక్రమాలు నిర్వహించే అవకాశం ఉంది.

ఈ ఎక్స్‌పోలో పలు ప్రముఖ దేశీయ, అంతర్జాతీయ ఆటోమొబైల్ కంపెనీలు పాల్గొనే అవకాశం ఉంది. మారుతి సుజుకి, హ్యుందాయ్, టాటా మోటార్స్, మహీంద్రా, టయోటా, కియా, హోండా, ఎంజీ, రెనాల్ట్ వంటి భారతీయ మార్కెట్లో ప్రముఖంగా ఉన్న సంస్థలతో పాటు మెర్సిడెస్ బెంజ్, బీఎండబ్ల్యూ, బీవైడీ, విన్‌ఫాస్ట్, జీప్, సిట్రోయెన్ వంటి అంతర్జాతీయ బ్రాండ్లు కూడా తమ వాహనాలను ప్రదర్శించవచ్చని అంచనా. కొత్త తరం కార్లు, ఎలక్ట్రిక్ వాహనాలు, కాన్సెప్ట్ మోడళ్లు, భవిష్యత్తు మొబిలిటీ టెక్నాలజీలు ఈ ప్రదర్శనలో ప్రత్యేక ఆకర్షణగా నిలిచే అవకాశం ఉంది.

మారుతి సుజుకి నుంచి వైఎంసీ ఎలక్ట్రిక్ ఎంపీవీ ప్రదర్శనకు వచ్చే అవకాశం ఉండగా, హ్యుందాయ్ కొత్త జనరేషన్ క్రెటా, నైరా, సబ్‌కాంపాక్ట్ ఎలక్ట్రిక్ కార్లను పరిచయం చేయవచ్చని సమాచారం. టయోటా నుంచి ఫార్చ్యూనర్ ఫేస్‌లిఫ్ట్, టైసర్ ఫేస్‌లిఫ్ట్ సందర్శకుల దృష్టిని ఆకర్షించవచ్చని భావిస్తున్నారు. కియా కొత్త సోనెట్‌ను, రెనాల్ట్ బ్రిడ్జర్, బిగ్‌స్టర్ మోడళ్లను ప్రదర్శించవచ్చని తెలుస్తోంది. మహీంద్రా కూడా విజన్ ఎస్, విజన్ టీ, బీఈ.07 వంటి కాన్సెప్ట్ మోడళ్లతో సందడి చేయవచ్చని అంచనా. అయితే ఏ కంపెనీ ఏ మోడల్‌ను ప్రదర్శిస్తుంది, ఏ వాహనాన్ని అధికారికంగా విడుదల చేస్తుందనే వివరాలు ఇంకా ఖరారు కావాల్సి ఉంది.