ఫీబీ గేట్స్‌ కంపెనీపై సంచలన ఆరోపణలు

మైక్రోసాఫ్ట్‌ సహ వ్యవస్థాపకుడు బిల్‌ గేట్స్‌ చిన్న కుమార్తె ఫీబీ గేట్స్‌ స్థాపించిన ‘ఫియా’ స్టార్టప్‌ వివాదంలో చిక్కుకుంది. డిజిటల్‌ పర్సనల్‌ షాపింగ్‌ అసిస్టెంట్‌గా పనిచేసే ఈ కంపెనీపై ‘కుకీ స్టఫింగ్‌’కు పాల్పడిందనే ఆరోపణలు వచ్చాయి. వినియోగదారులు కూపన్‌ కోడ్‌లు ఉపయోగించకపోయినా ట్రాకింగ్‌ కుకీలను జత చేసి రిటైలర్ల నుంచి అక్రమంగా కమిషన్‌ పొందినట్లు ఆరోపణలు ఉన్నాయి. ఈ ఆరోపణలు రుజువైతే అమెరికా చట్టాల ప్రకారం ‘ఫెడరల్‌ వైర్‌ ఫ్రాడ్‌’ కింద గరిష్ఠంగా 20 ఏళ్ల జైలు శిక్ష పడే అవకాశం ఉందని స్థానిక మీడియా కథనాలు పేర్కొంటున్నాయి.

అయితే ఈ ఆరోపణలపై ఫియా సంస్థ ఇప్పటికే స్పందించింది. జులైలో సమస్యను గుర్తించామని, ఇది సాంకేతిక లోపం కారణంగా జరిగిందని తెలిపింది. సంబంధిత ఫీచర్లను తొలగించడంతో పాటు భాగస్వామి సంస్థలకు నిధులను తిరిగి చెల్లించే ప్రక్రియను ప్రారంభించినట్లు వెల్లడించింది. మరోవైపు, సంస్థ వ్యవస్థాపకులకు ఈ సమస్య గురించి ఏడు నెలల ముందే సమాచారం ఉందనే ఆరోపణలు కూడా వినిపిస్తున్నాయి. ఈ నేపథ్యంలో ఫీబీ గేట్స్‌ కంపెనీపై వచ్చిన ఆరోపణలు, వాటి చట్టపరమైన పరిణామాలు ఇప్పుడు చర్చనీయాంశంగా మారాయి.