రీఛార్జ్‌ ప్లాన్లపై ట్రాయ్‌ కీలక ఆదేశాలు

టెలికాం సేవల్లో పారదర్శకతను పెంచే దిశగా టెలికాం రెగ్యులేటరీ అథారిటీ ఆఫ్ ఇండియా (ట్రాయ్‌) కీలక ఆదేశాలు జారీ చేసింది. టెలికాం ఆపరేటర్లు తమ వెబ్‌సైట్లు, మొబైల్ యాప్‌లలో రీఛార్జ్ ప్లాన్లు, టారిఫ్ వోచర్లను వినియోగదారులకు సులభంగా కనిపించేలా స్పష్టంగా ప్రదర్శించాలని ఆదేశించింది. కొన్ని తప్పనిసరి ప్లాన్లు వెబ్‌సైట్లు, యాప్‌లలో సులభంగా కనిపించడం లేదంటూ వినియోగదారుల నుంచి వచ్చిన ఫిర్యాదుల నేపథ్యంలో ఈ ఆదేశాలు జారీ చేసినట్లు ట్రాయ్‌ వెల్లడించింది.

టెలికాం కంపెనీలు తమ యాప్‌లు, వెబ్‌సైట్లలో ‘ట్రాయ్‌ తప్పనిసరి ప్యాక్‌లు’ పేరుతో ప్రత్యేక విభాగాన్ని ఏర్పాటు చేసి, ట్రాయ్‌ నిర్దేశించిన తప్పనిసరి వోచర్లను అందులో స్పష్టంగా చూపించాలని ఆదేశించింది. ప్రీపెయిడ్ రీఛార్జ్ విభాగాన్ని మొదటి ట్యాబ్‌లో ఉంచడంతో పాటు, విక్రయ కేంద్రాల్లోనూ ప్లాన్ల వివరాలను స్పష్టంగా ప్రదర్శించాలని పేర్కొంది. ఈ నిబంధనలను నిర్దేశిత గడువులో అమలు చేయాలని ట్రాయ్‌ స్పష్టం చేసింది. ఇప్పటికే 30 రోజుల వ్యాలిడిటీతో ప్లాన్ వోచర్, స్పెషల్ టారిఫ్ వోచర్, కాంబో వోచర్ అందుబాటులో ఉండేలా నిబంధనలు ఉన్నాయి.