సౌదీ విమాన సర్వీసులపై ఎయిర్ ఇండియా కీలక నిర్ణయం..

పశ్చిమాసియాలో ఉద్రిక్తతలు పెరుగుతున్న నేపథ్యంలో ఎయిర్ ఇండియా కీలక నిర్ణయం తీసుకుంది. సౌదీ అరేబియాకు నడిపే విమాన సర్వీసుల రద్దును నవంబర్ 14 వరకు పొడిగించింది. రియాద్, దమ్మామ్, జెడ్డా నగరాలకు వెళ్లే విమానాలు అప్పటివరకు నిలిచిపోనున్నాయి. ప్రాంతీయ పరిస్థితులు, ప్రయాణికుల భద్రతను దృష్టిలో ఉంచుకుని ఈ నిర్ణయం తీసుకున్నట్లు విమానయాన సంస్థ వెల్లడించింది.

మరోవైపు ఇండిగో, ఆకాశ ఎయిర్ సంస్థలు కూడా తమ విమాన సర్వీసులను తాత్కాలికంగా రద్దు చేశాయి. విమానాలు రద్దైన కారణంగా ఇబ్బందులు ఎదుర్కొంటున్న ప్రయాణికులు ఎలాంటి అదనపు ఛార్జీలు లేకుండా ప్రయాణ తేదీలను మార్చుకునే అవకాశం ఉంది. లేదంటే టికెట్ మొత్తాన్ని రీఫండ్‌గా పొందవచ్చు. ప్రయాణికులు విమానాశ్రయానికి వెళ్లే ముందు సంబంధిత విమానయాన సంస్థల అధికారిక వెబ్‌సైట్లలో తాజా సమాచారాన్ని పరిశీలించాలని సూచించారు.