శ్రీవారి భక్తులకు అలర్ట్‌.. ఫిబ్రవరి దర్శన టికెట్ల విడుదల తేదీలు ఖరారు

తిరుమల శ్రీవారి భక్తులకు టీటీడీ కీలక సమాచారం అందించింది. వచ్చే ఏడాది ఫిబ్రవరి నెలకు సంబంధించిన సుప్రభాతం, తోమాల, అర్చన, అష్టదళ పాదపద్మారాధన ఆర్జిత సేవల టికెట్ల ఎలక్ట్రానిక్‌ డిప్‌ రిజిస్ట్రేషన్‌ను ఈ నెల 18న ఉదయం 10 గంటలకు ఆన్‌లైన్‌లో ప్రారంభించనుంది. భక్తులు 20వ తేదీ ఉదయం 10 గంటల వరకు నమోదు చేసుకోవచ్చు. డిప్‌లో ఎంపికైన వారు అదే రోజు నుంచి 22వ తేదీ మధ్యాహ్నం 12 గంటలలోపు సేవా రుసుము చెల్లిస్తే టికెట్లు ఖరారవుతాయి. కల్యాణోత్సవం, ఊంజల్‌సేవ, ఆర్జిత బ్రహ్మోత్సవం, సహస్రదీపాలంకార సేవ, పుష్పయాగం టికెట్లను 21న ఉదయం 10 గంటలకు విడుదల చేయనుంది. వర్చువల్‌ సేవలు, వాటి దర్శన స్లాట్ల కోటాను అదే రోజు మధ్యాహ్నం 3 గంటలకు అందుబాటులోకి తీసుకురానుంది.

ఇక 23న ఉదయం 10 గంటలకు అంగప్రదక్షిణం టోకెన్లు, 11 గంటలకు శ్రీవాణి ట్రస్టు దర్శన కోటాను విడుదల చేయనుంది. అదే రోజు మధ్యాహ్నం 3 గంటలకు వృద్ధులు, దీర్ఘకాలిక వ్యాధులతో బాధపడేవారు, దివ్యాంగుల కోసం ఉచిత ప్రత్యేక ప్రవేశ దర్శన టోకెన్లను అందుబాటులో ఉంచనుంది. ఫిబ్రవరి నెలకు సంబంధించిన రూ.300 ప్రత్యేక ప్రవేశ దర్శనం టికెట్ల కోటాను 24న ఉదయం 10 గంటలకు విడుదల చేస్తారు. తిరుమల, తిరుపతిలో అద్దె గదుల బుకింగ్‌ కోటాను అదే రోజు మధ్యాహ్నం 3 గంటలకు అందుబాటులోకి తీసుకురానున్నారు. భక్తులు టీటీడీ అధికారిక వెబ్‌సైట్‌ ద్వారా టికెట్లు, దర్శనాలు, వసతి బుకింగ్‌ చేసుకోవాలని సూచించింది.