ఎన్సీపీ విలీనంపై సుప్రియా సూలే కీలక వ్యాఖ్యలు

ఎన్సీపీకి చెందిన రెండు వర్గాలు తిరిగి ఒక్కటవుతాయనే ఊహాగానాలు మరోసారి తెరపైకి వచ్చిన నేపథ్యంలో ఎన్సీపీ (ఎస్పీ) ఎంపీ సుప్రియా సూలే కీలక వ్యాఖ్యలు చేశారు. తన సోదరుడు, దివంగత నేత అజిత్‌ పవార్‌ మరణంతోనే రెండు వర్గాల విలీన ప్రక్రియకు సంబంధించిన చర్చలు ముగిసిపోయాయని స్పష్టం చేశారు. అజిత్‌ పవార్‌ జీవించి ఉన్న సమయంలో విలీనంపై చర్చలు జరిగాయని, ఇందుకు ఒక తేదీని కూడా ఖరారు చేసినట్లు వెల్లడించారు. అయితే ఆయన మరణించిన రోజుతోనే ఆ అంశానికి ముగింపు పడిందని పేర్కొన్నారు.

అజిత్‌ పవార్‌ మరణం తర్వాత విలీనంపై తమ పార్టీ ఎలాంటి ప్రకటన చేయలేదని సుప్రియా సూలే తెలిపారు. అజిత్‌ పవార్‌ వర్గం నుంచి కూడా తనకు ఎలాంటి ఫోన్‌ కాల్‌, సందేశం లేదా లేఖ అందలేదని చెప్పారు. విలీనంపై అజిత్‌ పవార్‌ కుటుంబ సభ్యులతో చర్చలు జరిపే అవకాశం ఉందా? అన్న ప్రశ్నకు స్పందిస్తూ.. వ్యక్తిగత బంధుత్వాలను రాజకీయాలతో ముడిపెట్టకూడదని అభిప్రాయపడ్డారు. అలాగే భాజపా నేతృత్వంలోని ఎన్డీయేలో ఎన్సీపీ (ఎస్పీ) చేరుతుందనే ఊహాగానాలను కూడా ఆమె ఖండించారు.