జనరల్
1, నవంబర్ 2026, ఆదివారం
విద్యార్థులకు ప్రతిష్టాత్మక విద్యాసంస్థ బిట్స్‌ పిలానీ శుభవార్త అందించింది. 2027లో నిర్వహించే బిట్స్‌ ప్రవేశ పరీక్ష (BITSAT)లో అత్యుత్తమ ర్యాంకులు సాధించిన తొలి 1,000 మంది విద్యార్థులకు పూర్తి ట్యూషన్‌ ఫీజు స్కాలర్‌షిప్‌ అందించనున్నట్లు ప్రకటించింది. అయితే, ఈ పథకానికి అర్హత పొందాలంటే విద్యార్థుల కుటుంబ వార్షిక ఆదాయం రూ.20 లక్షలకు మించకూడదు. బిర్లా ఇన్‌స్టిట్యూట్ ఆఫ్ సైన్స్ అండ్ టెక్నాలజీ పిలానీ వైస్‌ ఛాన్సలర్‌ వి. రామ్‌గోపాల్‌ రావు ఈ విషయాన్ని వెల్లడించారు. నాలుగేళ్ల పాటు స్కాలర్‌షిప్‌ ప్రయోజనం కొనసాగాలంటే విద్యార్థులు కనీసం 7.5 సీజీపీఏ సాధించాలని స్పష్టం చేశారు.
అర్హులైన విద్యార్థులకు అడ్మిషన్‌తో పాటే స్కాలర్‌షిప్‌ మంజూరు చేస్తారు. ఇందుకోసం ప్రత్యేకంగా దరఖాస్తు చేసుకోవాల్సిన అవసరం లేదు. బిట్స్‌ పిలానీ క్యాంపస్‌లలో బీఈ, ఎమ్మెస్సీ, బీఫార్మా వంటి ఇంటిగ్రేటెడ్‌ ఫస్ట్‌ డిగ్రీ కోర్సుల్లో ప్రవేశాల కోసం ఏటా BITSAT నిర్వహిస్తారు. 2025–26 విద్యా సంవత్సరంలో వివిధ డిగ్రీ, పీహెచ్‌డీ కోర్సుల విద్యార్థులకు స్కాలర్‌షిప్‌లు, ఫీజు రాయితీలు, ఫెలోషిప్‌ల రూపంలో సంస్థ దాదాపు రూ.190 కోట్లు అందించింది. ఇందులో యూజీ విద్యార్థుల మెరిట్‌, మెరిట్‌ కమ్‌ నీడ్‌, అంతర్జాతీయ విద్యార్థుల స్కాలర్‌షిప్‌ల కోసం రూ.101 కోట్లు కేటాయించింది. తమ క్యాంపస్‌లలో ప్రతి నలుగురు విద్యార్థుల్లో ఒకరు ఆర్థిక సహాయం పొందుతున్నారని సంస్థ వెల్లడించింది.
కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!