సికింద్రాబాద్‌ రైల్వే స్టేషన్‌లో రూ.60 లక్షల నకిలీ నోట్లు స్వాధీనం..

సికింద్రాబాద్‌ రైల్వే స్టేషన్‌లో పోలీసులు భారీగా నకిలీ కరెన్సీ నోట్లను స్వాధీనం చేసుకున్నారు. రాజస్థాన్‌లోని బికనేర్‌ జిల్లాకు చెందిన శివరతన్‌ మహియాను అరెస్టు చేసి, అతని వద్ద నుంచి రూ.60 లక్షల విలువైన నకిలీ నోట్లను స్వాధీనం చేసుకున్నట్లు అధికారులు వెల్లడించారు. జైపూర్‌ నుంచి ముంబయికి నకిలీ నోట్లను తరలిస్తున్న అతడు అక్టోబర్‌ 31న ముంబయి ఎల్‌టీటీ ఎక్స్‌ప్రెస్‌ జనరల్‌ కోచ్‌లో ప్రయాణిస్తుండగా రైల్వే పోలీసులు గుర్తించి అదుపులోకి తీసుకున్నారు.

పోలీసుల వివరాల ప్రకారం.. మరో నిందితుడు ఓం ప్రకాశ్‌ అక్టోబర్‌ 28న జైపూర్‌ రైల్వే స్టేషన్‌లో నకిలీ నోట్లున్న బ్యాగును శివరతన్‌కు అందజేసి, ముంబయిలోని ఓ వ్యక్తికి అప్పగించాలని సూచించాడు. ఈ పని చేసినందుకు రూ.2.20 లక్షలు చెల్లించేలా ఒప్పందం కుదుర్చుకున్నట్లు తెలుస్తోంది. మైసూరు ఎక్స్‌ప్రెస్‌లో కాచిగూడకు చేరుకున్న శివరతన్‌.. అక్కడి నుంచి ముంబయి ఎల్‌టీటీ ఎక్స్‌ప్రెస్‌లో ప్రయాణిస్తుండగా అరెస్టయ్యాడు. రాజస్థాన్‌లో ఓం ప్రకాశ్‌పై గతంలోనూ క్రిమినల్‌ కేసులు నమోదైనట్లు పోలీసులు గుర్తించారు. ప్రస్తుతం అతడు పరారీలో ఉండగా, మరో నిందితుడి కోసం కూడా పోలీసులు గాలిస్తున్నారు.