ట్రంప్‌ రిసార్ట్‌కు సమీపంలో ఘోర విమాన ప్రమాదం

అమెరికాలోని ఫ్లోరిడా రాష్ట్రం పామ్‌ బీచ్‌ కౌంటీలో ఘోర విమాన ప్రమాదం చోటుచేసుకుంది. తొమ్మిది మందితో ప్రయాణిస్తున్న ఓ బిజినెస్‌ జెట్‌ అత్యంత వేగంతో రోడ్డుపై కూలిపోయి, క్షణాల్లో భారీ అగ్నిగోళంగా మారింది. ప్రమాద తీవ్రతకు విమానంలో ఉన్న వారంతా ప్రాణాలు కోల్పోయినట్లు సమాచారం. విమానం కూలిన ధాటికి రోడ్డుపై పెద్ద గొయ్యి ఏర్పడింది. అమెరికా అధ్యక్షుడు డొనాల్డ్‌ ట్రంప్‌నకు చెందిన మార్‌-ఎ-లాగో రిసార్ట్‌కు సుమారు 14 కిలోమీటర్ల దూరంలో ఈ ఘటన జరగడంతో తీవ్ర చర్చకు దారితీసింది. అయితే విమానం నివాస ప్రాంతాలకు, ఇతర వాహనాలకు దూరంగా కూలిపోవడంతో మరింత భారీ ప్రాణనష్టం తప్పినట్లు తెలుస్తోంది.

అమెరికా కాలమానం ప్రకారం ఆదివారం టెక్సాస్‌ రాష్ట్రంలోని ఆస్టిన్‌ ప్రాంతం నుంచి బహమాస్‌కు బయల్దేరిన ఈ విమానం ప్రమాదానికి ముందు ఎయిర్‌ ట్రాఫిక్‌ కంట్రోల్‌ను సంప్రదించింది. విమానం అదుపు తప్పి వేగంగా ఎత్తును కోల్పోతోందని సిబ్బంది ఆందోళన వ్యక్తం చేసినట్లు స్థానిక మీడియా కథనాలు వెల్లడించాయి. ‘‘మాకు సమయం లేదు’’ అంటూ సిబ్బంది ఆర్తనాదాలు చేసిన ఆడియో క్లిప్‌ కూడా బయటకు వచ్చింది. పైలట్‌ తొలుత విమానంలో స్వల్ప కుదుపులు ఉన్నాయని, వాటిని నియంత్రించగలమని తెలిపినప్పటికీ, ఆ తర్వాత పరిస్థితి ఒక్కసారిగా విషమించింది. సిబ్బంది ‘మేడే’ అత్యవసర సంకేతాన్ని పంపిస్తూ విమానం వేగంగా ఎత్తును కోల్పోతోందని హెచ్చరించారు. ఈ ప్రమాదానికి గల కారణాలను గుర్తించేందుకు ఫెడరల్‌ ఏవియేషన్‌ అడ్మినిస్ట్రేషన్‌ (FAA), నేషనల్‌ ట్రాన్స్‌పోర్టేషన్‌ సేఫ్టీ బోర్డ్‌ (NTSB) దర్యాప్తు చేపట్టాయి. ప్రమాద దృశ్యాలు సామాజిక మాధ్యమాల్లో వైరల్‌గా మారాయి.