యూపీఐ ఛార్జీలపై వ్యాపారుల నిరసనకు బ్రేక్

యూపీఐ వ్యాపారి లావాదేవీలపై ప్రతిపాదించిన మర్చంట్ డిస్కౌంట్ రేట్‌కు వ్యతిరేకంగా అక్టోబర్ 2న నిర్వహించాలనుకున్న ‘నో యూపీఐ డే’ నిరసనను వ్యాపార సంఘాలు విరమించుకున్నాయి. కేంద్ర ఆర్థిక మంత్రి నిర్మలా సీతారామన్‌తో సుమారు 20 మంది వ్యాపార, రిటైల్ ప్రతినిధులు సమావేశమైన అనంతరం ఈ నిర్ణయం తీసుకున్నారు.

రూ.2,000కు మించిన అర్హత కలిగిన వ్యాపారి యూపీఐ లావాదేవీలపై 0.4 శాతం ఎండీఆర్‌ విధించే ప్రతిపాదనపై వ్యాపారులు ఆందోళన వ్యక్తం చేశారు. చిన్న, మధ్య తరహా వ్యాపారాలపై అదనపు ఆర్థిక భారం పడే అవకాశం ఉందని తెలిపారు. చాందినీ చౌక్ ఎంపీ, కాన్ఫెడరేషన్ ఆఫ్ ఆల్ ఇండియా ట్రేడర్స్ ప్రధాన కార్యదర్శి ప్రవీణ్ ఖండేల్‌వాల్ నేతృత్వంలోని ప్రతినిధి బృందం ఈ అంశంపై స్పష్టత, సమీక్ష కోరింది. సమావేశం సానుకూలంగా జరిగిందని, తమ అభ్యంతరాలను ప్రభుత్వం పరిశీలిస్తామని హామీ ఇచ్చిందని ఖండేల్‌వాల్ తెలిపారు.