రాపిడోకు సీసీపీఏ భారీ జరిమానా

ప్రముఖ రైడ్‌-హేలింగ్‌ ప్లాట్‌ఫామ్‌ రాపిడోను నిర్వహిస్తున్న రోప్పెన్‌ ట్రాన్స్‌పోర్టేషన్‌ సర్వీసెస్‌ ప్రైవేట్‌ లిమిటెడ్‌కు కేంద్ర వినియోగదారుల రక్షణ సంస్థ (సీసీపీఏ) రూ.10 లక్షల జరిమానా విధించింది. రైడ్‌ బుకింగ్‌ పూర్తయ్యే ముందు ప్రయాణికులను అదనంగా చెల్లించేలా ప్రోత్సహించే భ్రామక ప్రాంప్ట్‌లు, అన్యాయ వాణిజ్య విధానాలు, డార్క్‌ ప్యాటర్న్స్‌ ఉపయోగించినట్లు సీసీపీఏ గుర్తించింది. ఈ చర్య సెప్టెంబర్‌ 15న వెల్లడైంది.

రాపిడో యాప్‌లో “ఎక్కువ ధర చెల్లిస్తే రైడ్‌ లభించే అవకాశం ఎక్కువ” వంటి సందేశాలు, అలాగే డ్రైవర్లు సూచించిన ధరను అంగీకరించడం లేదంటూ అదనంగా రూ.10, రూ.20, రూ.30 చెల్లించేందుకు ప్రేరేపించే ప్రాంప్ట్‌లు కనిపించినట్లు సీసీపీఏ తెలిపింది. వీటిని ‘కన్ఫర్మ్‌ షేమింగ్‌’, ‘ఇంటర్‌ఫేస్‌ ఇంటర్‌ఫియరెన్స్‌’ అనే డార్క్‌ ప్యాటర్న్స్‌గా పేర్కొంది. అలాగే ‘సెట్‌ యువర్‌ ప్రైస్‌’ స్లైడర్‌ డిజైన్‌ కూడా అధిక మొత్తాన్ని ఎంచుకునేలా వినియోగదారుల నిర్ణయాన్ని ప్రభావితం చేసిందని సీసీపీఏ పేర్కొంది.