‘37’ పోస్టర్‌తో అల్లు అర్జున్ ‘రాకా’పై ఆసక్తికర చర్చ.. అసలు మర్మం ఏంటి?

ఐకాన్ స్టార్ అల్లు అర్జున్, దర్శకుడు అట్లీ కాంబినేషన్‌లో తెరకెక్కుతున్న భారీ చిత్రం ‘రాకా’ నుంచి విడుదలైన క్రైప్టిక్ పోస్టర్ ఇప్పుడు సినీ వర్గాల్లో ఆసక్తిని పెంచుతోంది. డార్క్ బ్యాక్‌డ్రాప్‌లో కేవలం ‘37’ అనే నంబర్‌ను మాత్రమే చూపిస్తూ మేకర్స్ ఈ పోస్టర్‌ను విడుదల చేశారు. దీంతో ఈ సంఖ్య వెనుక ఉన్న అర్థం ఏమిటనే చర్చ మొదలైంది.

సోషల్ మీడియాలో ‘37’కు సంబంధించి అభిమానులు పలు థియరీలను ప్రచారం చేస్తున్నారు. దర్శకుడు అట్లీ పుట్టినరోజు సెప్టెంబర్ 21 కావడంతో 3 × 7 = 21 అంటూ నెటిజన్లు లెక్కలు వేస్తున్నారు. సెప్టెంబర్ 21న ‘రాకా’ నుంచి ఏదైనా ప్రత్యేక అప్‌డేట్ వచ్చే అవకాశం ఉందని అభిమానులు అంచనా వేస్తున్నారు. అయితే ఈ నంబర్‌కు అట్లీ పుట్టినరోజుకు సంబంధం ఉందా లేదా అనే విషయాన్ని మేకర్స్ అధికారికంగా వెల్లడించలేదు.

సన్ పిక్చర్స్ బ్యానర్‌పై భారీ బడ్జెట్‌తో ఈ చిత్రాన్ని నిర్మిస్తున్నారు. బాలీవుడ్ స్టార్ హీరోయిన్ దీపికా పదుకొణె ఇప్పటికే షూటింగ్‌లో పాల్గొంటున్నారు. యువ సంగీత దర్శకుడు సాయి అభ్యంకర్ ఈ చిత్రానికి సంగీతం అందిస్తున్నారు. అట్లీ మాస్ టేకింగ్‌కు అల్లు అర్జున్ ఇమేజ్ తోడవడంతో ‘రాకా’పై ప్రేక్షకుల్లో అంచనాలు రోజురోజుకూ పెరుగుతున్నాయి.