దగ్గు సిరప్‌ల విక్రయాలపై కేంద్రం కీలక నిర్ణయం

దగ్గు మందులు మరియు ఇతర ఔషధ సిరప్‌ల విక్రయాలపై కేంద్ర ప్రభుత్వం కీలక నిర్ణయం తీసుకుంది. 1945 ఔషధ నిబంధనల్లో మార్పులు చేస్తూ, ఇకపై దగ్గు మందులు కొనుగోలు చేయాలంటే తప్పనిసరిగా వైద్యుడి ప్రిస్క్రిప్షన్ సమర్పించాల్సి ఉంటుందని ఆరోగ్యశాఖ ప్రకటించింది. ఈ మేరకు వాటిని షెడ్యూల్ ‘కె’ ఔషధాల జాబితా నుంచి తొలగిస్తూ నోటిఫికేషన్ జారీ చేసింది.

గత ఏడాది రాజస్థాన్, మధ్యప్రదేశ్ రాష్ట్రాల్లో నాసిరకం దగ్గు సిరప్ కారణంగా 20 మందికి పైగా చిన్నారులు మరణించిన ఘటనల నేపథ్యంలో ఈ నిర్ణయం తీసుకున్నారు. విచారణలో సంబంధిత సిరప్‌లో అత్యంత విషపూరితమైన డైఇథైలిన్ గ్లైకాల్ అధిక మోతాదులో ఉన్నట్లు తేలడంతో దానిపై నిషేధం విధించారు. ఇలాంటి ఘటనలు పునరావృతం కాకుండా ప్రజారోగ్య భద్రత దృష్ట్యా కేంద్రం ఈ కఠిన చర్యలు చేపట్టింది.