తుఫాన్‌ బాధితులకు తక్షణ సాయం.. అధికారులకు చంద్రబాబు కీలక ఆదేశాలు

ఆంధ్రప్రదేశ్‌ ముఖ్యమంత్రి చంద్రబాబు నాయుడు అర్నబ్‌ అతి తీవ్ర తుపాను ప్రభావంపై అధికారులతో మరోసారి సమీక్ష నిర్వహించారు. ఆర్టీజీఎస్‌, వివిధ జిల్లాల కలెక్టర్లు, విద్యుత్‌, నీటిపారుదల, వ్యవసాయ, రహదారులు-భవనాలు, మున్సిపల్‌, పంచాయతీరాజ్‌ శాఖల అధికారులు, క్షేత్రస్థాయి సిబ్బంది సహా సుమారు 32 వేల మందితో టెలికాన్ఫరెన్స్‌ నిర్వహించారు. తుపాను కారణంగా పంటలకు జరిగిన నష్టంపై ప్రాథమిక అంచనాలను అడిగి తెలుసుకున్నారు. ఇప్పటివరకు 8 వేల హెక్టార్లలో కొబ్బరి, 5 వేల హెక్టార్లలో అరటి, ఇతర ఉద్యాన పంటలు దెబ్బతిన్నట్లు అధికారులు వివరించారు. తుపాను నష్టంపై కేంద్ర ప్రభుత్వానికి సమర్పించేందుకు సమగ్ర నివేదిక సిద్ధం చేయాలని సీఎం ఆదేశించారు. ప్రాణనష్టం జరగకుండా ముందస్తు చర్యలు చేపట్టిన అధికారులను అభినందించారు.

తుపాను ప్రభావం పూర్తిగా తగ్గి సాధారణ పరిస్థితులు నెలకొనే వరకు అన్ని శాఖలు సమన్వయంతో పనిచేయాలని చంద్రబాబు సూచించారు. రహదారులపై కూలిన చెట్లను రెండు గంటల్లోగా తొలగించి రాకపోకలను పునరుద్ధరించాలని, జాతీయ రహదారులపై చెట్లు పడితే వెంటనే తొలగించాలని ఆదేశించారు. ఈదురుగాలుల తీవ్రత తగ్గిన వెంటనే విద్యుత్‌ సరఫరాను పునరుద్ధరించాలని, తుపాను ప్రభావిత ప్రాంతాల్లో వీలైనంత త్వరగా సాధారణ పరిస్థితులు నెలకొనేలా చర్యలు తీసుకోవాలని స్పష్టం చేశారు. పునరావాస కేంద్రాల్లో ఆశ్రయం పొందుతున్న వారికి ఆహారం, తాగునీరు, వైద్య సదుపాయాలు అందుబాటులో ఉండేలా చూడాలని, ప్రజలకు భద్రతపై భరోసా కల్పిస్తూ ఆస్తి నష్టాన్ని తగ్గించేందుకు చర్యలు చేపట్టాలని అధికారులను ఆదేశించారు.