యూపీ ఎమ్మెల్సీ ఎన్నికల్లో బీజేపీ, ఎస్పీ మధ్య హోరాహోరీ..

ఉత్తరప్రదేశ్‌ శాసనమండలి (ఎమ్మెల్సీ) ఎన్నికల ఫలితాల్లో అధికార బీజేపీ, ప్రధాన ప్రతిపక్ష సమాజ్‌వాదీ పార్టీ (ఎస్పీ) మధ్య తీవ్ర పోటీ నెలకొంది. త్వరలో జరగనున్న అసెంబ్లీ ఎన్నికలకు ముందు ఈ ఫలితాలు రాజకీయంగా ప్రాధాన్యం సంతరించుకున్నాయి. అందించిన సమాచారం ప్రకారం, మొత్తం 11 స్థానాల్లో ఇప్పటివరకు ఎనిమిది స్థానాల ఫలితాలు వెలువడగా.. బీజేపీ ఐదు చోట్ల, ఎస్పీ మూడు స్థానాల్లో విజయం సాధించాయి. మిగిలిన మూడు స్థానాల్లో ఓట్ల లెక్కింపు కొనసాగుతోంది. వారణాసి, ఆగ్రా, ఝాన్సీ స్థానాల్లో ఎస్పీ విజయాలు నమోదు చేసింది. వారణాసి ఉపాధ్యాయ నియోజకవర్గంలో సిట్టింగ్‌ ఎమ్మెల్సీ, ఎస్పీ అభ్యర్థి లాల్‌ బిహారీ యాదవ్‌.. బీజేపీ అభ్యర్థి ప్రమోద్‌ మిశ్రాపై సుమారు 4,900 ఓట్ల మెజారిటీతో గెలుపొందారు. ఆగ్రా ఉపాధ్యాయ నియోజకవర్గంలో డాక్టర్‌ ఆకాశ్‌ అగర్వాల్‌ విజయం సాధించగా, ఝాన్సీ గ్రాడ్యుయేట్‌ స్థానాన్ని కూడా ఎస్పీ దక్కించుకుంది.

మరోవైపు, మీరట్‌ గ్రాడ్యుయేట్‌, మీరట్‌ ఉపాధ్యాయ, లక్నో ఉపాధ్యాయ, బరేలీ-మొరాదాబాద్‌ ఉపాధ్యాయ, ఆగ్రా గ్రాడ్యుయేట్‌ స్థానాల్లో బీజేపీ విజయం సాధించింది. మీరట్‌లో గ్రాడ్యుయేట్‌ స్థానానికి దినేశ్‌ కుమార్‌ గోయల్‌, ఉపాధ్యాయ స్థానానికి శ్రీచంద్‌ శర్మ ఎన్నికయ్యారు. బరేలీ-మొరాదాబాద్‌ ఉపాధ్యాయ నియోజకవర్గంలో బీజేపీ అభ్యర్థి హరి సింగ్‌ ధిల్లాన్‌.. ఎస్పీ అభ్యర్థి దానిష్‌ అక్తర్‌పై 17,676 ఓట్ల మెజారిటీతో గెలిచారు. గోరఖ్‌పూర్‌ ఉపాధ్యాయ నియోజకవర్గంలోనూ బీజేపీ ఆధిక్యంలో ఉన్నట్లు సమాచారం. ఇదిలా ఉండగా, ఆగ్రాలో గెలుపొందిన ఎస్పీ అభ్యర్థి డాక్టర్‌ ఆకాశ్‌ అగర్వాల్‌పై దాడి జరిగిందని ఎస్పీ అధ్యక్షుడు అఖిలేశ్‌ యాదవ్‌ ఆరోపించారు. చిరిగిన కుర్తాతో ఉన్న ఆకాశ్‌ అగర్వాల్‌ వీడియోను ఎక్స్‌ వేదికగా పంచుకున్న ఆయన.. విజేతకు ఎన్నికల ధ్రువీకరణ పత్రాన్ని వెంటనే అందించాలని డిమాండ్‌ చేశారు. ఈ ఘటనపై బీజేపీ సమాధానం చెప్పాలని కోరారు.