శ్రీదేవి మరణం తర్వాత జాన్వీకి అండగా నిలిచిన వ్యక్తి ఎవరో తెలుసా?

బాలీవుడ్ నటి జాన్వీ కపూర్ తన వ్యక్తిగత జీవితం, ముఖ్యంగా శిఖర్ పహారియాతో ఉన్న అనుబంధం గురించి ‘కాఫీ విత్ కరణ్’ టాక్ షోలో ఆసక్తికర విషయాలను పంచుకుంది. తన జీవితంలో అత్యంత కష్టమైన సమయంలో శిఖర్ తనకు అందించిన అండను గుర్తుచేసుకుంటూ భావోద్వేగానికి గురైంది. 2018లో తన తల్లి, ప్రముఖ నటి శ్రీదేవి ఆకస్మికంగా మరణించినప్పుడు కుటుంబం ఎదుర్కొన్న బాధాకర పరిస్థితుల గురించి జాన్వీ వివరించింది. ఆ సమయంలో లండన్‌లో చదువుకుంటున్న శిఖర్ పహారియా తన చదువును మధ్యలోనే ఆపేసి ముంబైకి తిరిగి వచ్చాడని వెల్లడించింది. తనకు ఎప్పుడు ఏ అవసరం వస్తుందోనని, తాను ఒంటరిగా ఉండిపోతానేమోనని ఆందోళన చెందిన శిఖర్.. జుహులోని తన స్నేహితుడి ఇంట్లో దాదాపు నెల రోజుల పాటు రహస్యంగా ఉన్నాడనే విషయం తనకు చాలా కాలం తర్వాత తెలిసిందని జాన్వీ చెప్పింది.

తల్లిని కోల్పోయిన సమయంలో తన చెల్లెలు ఖుషీ కపూర్ కూడా ఎంతో ధైర్యంగా వ్యవహరించిందని జాన్వీ గుర్తుచేసుకుంది. తాను బాధతో ఏడుస్తున్న సమయంలో ఖుషీ తన కన్నీళ్లను ఆపుకుని తనకు ధైర్యం చెప్పిందని వివరించింది. జాన్వీ, శిఖర్ గత కొన్నేళ్లుగా ప్రేమలో ఉన్నట్లు వార్తలు వస్తున్నప్పటికీ, తమ బంధాన్ని వారు అధికారికంగా ప్రకటించలేదు. అయితే పలు ఇంటర్వ్యూలలో జాన్వీ తన జీవితంలో శిఖర్ పాత్ర ఎంత ముఖ్యమో వెల్లడించింది. సినిమాల విషయానికి వస్తే, జాన్వీ ఇటీవల రామ్ చరణ్ సరసన ‘పెద్ది’ చిత్రంలో నటించింది. ప్రస్తుతం టైగర్ ష్రాఫ్, లక్ష్యలతో కలిసి ‘లగ్ జా గలే’ సినిమాలో నటిస్తోంది. ఈ చిత్రం 2027 మే 14న ప్రేక్షకుల ముందుకు రానుంది.