సిరిసిల్లకు తొలిసారి సీఎం రేవంత్

తెలంగాణ ముఖ్యమంత్రి ఎ. రేవంత్‌ రెడ్డి ఈ నెల 30న రాజన్న సిరిసిల్ల జిల్లాలో పర్యటించనున్నారు. సిరిసిల్ల రగుడు బైపాస్‌ సమీపంలోని మైదానంలో నిర్వహించనున్న భారీ బహిరంగ సభలో సీఎం పాల్గొని ప్రసంగించనున్నారు. పర్యటనలో భాగంగా పలు అభివృద్ధి పనులకు శంకుస్థాపనలు, ప్రారంభోత్సవాలు చేయనున్నారు. విద్య, మౌలిక వసతులు, మహిళా సాధికారత, నేతన్నల సంక్షేమానికి సంబంధించిన అంశాలకు ప్రాధాన్యం ఇవ్వనున్నట్లు అధికారులు తెలిపారు.

సిరిసిల్లతో పాటు వేములవాడలోనూ సీఎం పలు కార్యక్రమాల్లో పాల్గొననున్నారు. వేములవాడ శ్రీ రాజరాజేశ్వర స్వామి ఆలయ అభివృద్ధి పనులకు ప్రభుత్వం ఇప్పటికే అదనంగా రూ.99.40 కోట్లు మంజూరు చేసింది. దీంతో ఆలయ అభివృద్ధికి విడుదలైన మొత్తం నిధులు రూ.249.40 కోట్లకు చేరుకున్నాయి. జిల్లాలో విద్యా, పరిపాలనా మౌలిక వసతుల అభివృద్ధికి సంబంధించిన కార్యక్రమాలు కూడా సీఎం పర్యటనలో కీలకంగా ఉండనున్నాయి.