ప్రధాని పర్యటన నేపథ్యంలో అధికారులకు కలెక్టర్ కీలక ఆదేశాలు

డిసెంబర్ మొదటి వారంలో తిరుపతిలో నిర్వహించనున్న డీజీపీలు, ఐజీపీల జాతీయ స్థాయి సదస్సుకు ప్రధానమంత్రి నరేంద్ర మోదీ హాజరుకానున్న నేపథ్యంలో ఏర్పాట్లను పకడ్బందీగా పూర్తి చేయాలని జిల్లా కలెక్టర్ డా. ఎస్. వెంకటేశ్వర్ అధికారులను ఆదేశించారు. మంగళవారం కలెక్టరేట్‌లో జిల్లా ఎస్పీ ఎల్. సుబ్బరాయుడు, జాయింట్ కలెక్టర్ ఆర్. గోవిందరావుతో కలిసి వివిధ శాఖల అధికారులతో ఆయన సమీక్ష నిర్వహించారు. సదస్సుకు హాజరయ్యే జాతీయ స్థాయి ప్రముఖుల కోసం వసతి, భద్రత, రవాణా, విద్యుత్, వైద్యం, తాగునీరు, పారిశుధ్యం వంటి సదుపాయాలను నిర్దేశిత గడువులోగా సిద్ధం చేయాలని సూచించారు.

ప్రభుత్వ, ప్రైవేట్ హోటళ్లు, వసతి గృహాలు, హోమ్‌స్టేల వివరాలను సేకరించి రిజర్వేషన్లు పూర్తి చేయాలని, పెండింగ్ మరమ్మతులను త్వరగా చేపట్టాలని కలెక్టర్ ఆదేశించారు. నగరంలో రహదారుల సుందరీకరణ, ఫుట్‌పాత్‌ల అభివృద్ధి, వీధి దీపాల ఏర్పాట్లను నాణ్యతతో పూర్తి చేయాలని సూచించారు. ఐసర్ (IISER), ఐఐటీ (IIT), ఇండియన్ కులినరీ ఇన్‌స్టిట్యూట్ (ICI)ల్లో చేపట్టాల్సిన ఏర్పాట్లను పరిశీలించేందుకు అధికారులు క్షేత్రస్థాయి పర్యటనలు నిర్వహించాలని తెలిపారు. ప్రతి శాఖ తనకు కేటాయించిన బాధ్యతలపై కార్యాచరణ రూపొందించుకుని, పనులను నిరంతరం పర్యవేక్షించాలని, సమస్యలను వెంటనే పరిష్కరించాలని స్పష్టం చేశారు.