ఢిల్లీ మురికివాడలకు పరదాలు, కాంగ్రెస్ విమర్శలు

ఢిల్లీలో జరుగుతున్న బ్రిక్స్ దేశాల శిఖరాగ్ర సదస్సు సందర్భంగా మురికివాడలను కర్టెన్లతో కప్పివేయడంపై కాంగ్రెస్ ఎంపీ పవన్ ఖేరా కేంద్ర ప్రభుత్వంపై తీవ్రస్థాయిలో విమర్శలు గుప్పించారు. బీజేపీకి అన్ని ‘హిజాబ్‌లు’ ఆమోదయోగ్యం కాదని, కానీ ప్రధాని మోదీ వైఫల్యాలను కప్పిపుచ్చే హిజాబ్ అంటే మాత్రం వారికి ఎంతో ఇష్టమని ఆయన ఎక్స్‌లో ఓ వీడియోను పోస్ట్ చేస్తూ ఎద్దేవా చేశారు.

విదేశీ ప్రతినిధుల నుంచి దేశంలోని పేదరికాన్ని, సామాజిక-ఆర్థిక వాస్తవాలను దాచిపెట్టేందుకే కేంద్రం ఈ చర్యలకు పాల్పడుతోందని ఖేరా ఆరోపించారు. పేదరికాన్ని నిర్మూలించే బదులు, దాన్ని కనిపించకుండా దాచిపెట్టడం ద్వారా ప్రపంచానికి నగరానికి సంబంధించి ఓ కృత్రిమ చిత్రాన్ని చూపాలని ప్రభుత్వం ప్రయత్నిస్తోందని విమర్శించారు.

అయితే, ఈ చర్యలను ప్రభుత్వ సంస్థలు సమర్థించుకున్నాయి. వీఐపీలు ప్రయాణించే మార్గాల్లో భద్రతా చర్యలు, ట్రాఫిక్ నిర్వహణ, సుందరీకరణ వంటివి ప్రామాణిక ప్రొటోకాల్‌లో భాగమేనని పేర్కొన్నాయి. ఇందిరా గాంధీ అంతర్జాతీయ విమానాశ్రయం నుంచి సదస్సు వేదికైన భారత్ మండపం వరకు ఉన్న కీలక మార్గాల్లో ఈ కర్టెన్లు, బారికేడ్లను ఏర్పాటు చేశారు.

భారత్ అధ్యక్షతన నిన్న ప్రారంభమైన 18వ బ్రిక్స్ శిఖరాగ్ర సదస్సు ఢిల్లీలో జరుగుతోంది. ‘బిల్డింగ్ ఫర్ రెసిలియన్స్, ఇన్నోవేషన్, కోఆపరేషన్ అండ్ సస్టైనబిలిటీ’ అనే థీమ్‌తో ఈ సదస్సును నిర్వహిస్తున్నారు. ఈ సదస్సులో అభివృద్ధి, సుస్థిరత, ఆవిష్కరణ వంటి అంశాలు ప్రధాన ఎజెండాగా ఉన్నాయి.