ట్రంప్‌ మీడియా నిషేధానికి కోర్టు బ్రేక్‌

అమెరికా అధ్యక్షుడు డొనాల్డ్‌ ట్రంప్‌ ప్రభుత్వానికి కోర్టులో ఎదురుదెబ్బ తగిలింది. సీఎన్‌ఎన్‌, ఎంఎస్‌ నౌ, పొలిటికోకు చెందిన జర్నలిస్టులను వైట్‌హౌస్‌లోకి అనుమతించకుండా విధించిన నిషేధాన్ని ఫెడరల్‌ జడ్జి టిమ్‌ కెల్లీ తాత్కాలికంగా అడ్డుకున్నారు. ఈ మూడు సంస్థలకు చెందిన జర్నలిస్టుల ప్రెస్‌ అనుమతులను వెంటనే పునరుద్ధరించాలని ఆదేశించారు. 14 రోజుల పాటు ఈ తాత్కాలిక ఉత్తర్వులు అమల్లో ఉంటాయి. నిషేధం తమ రాజ్యాంగ హక్కులు, సముచిత న్యాయ ప్రక్రియకు విరుద్ధమంటూ మూడు మీడియా సంస్థలు కోర్టును ఆశ్రయించాయి.

మూడు మీడియా సంస్థలు తప్పుడు వార్తలు ప్రచారం చేస్తున్నాయని ఆరోపిస్తూ ట్రంప్‌ వాటిపై నిషేధం విధించారు. అయితే ప్రభుత్వం మాత్రం వైట్‌హౌస్‌ ప్రవేశం హక్కు కాదని, జాతీయ భద్రతతో పాటు జర్నలిస్టుల వృత్తిపరమైన ప్రమాణాలను దృష్టిలో ఉంచుకుని ఈ నిర్ణయం తీసుకున్నామని కోర్టుకు తెలిపింది. ఈ వాదనపై జడ్జి కెల్లీ సందేహాలు వ్యక్తం చేశారు. నిషేధానికి ముందు జర్నలిస్టులకు సరైన నోటీసు ఇవ్వలేదని, తమ వాదన వినిపించే అవకాశం కూడా కల్పించలేదని పేర్కొన్నారు. ఇదే సమయంలో వైట్‌హౌస్‌ ‘ట్రంప్‌ టీవీ: ది ఎసెన్షియల్స్‌ స్టేషన్‌’ పేరుతో 24 గంటల డిజిటల్‌ ప్రసారాన్ని యూట్యూబ్‌, వైట్‌హౌస్‌ వెబ్‌సైట్‌లో ప్రారంభించింది.