తుఫాన్‌ ప్రభావంతో విమాన, రైలు సర్వీసులకు అంతరాయం

తుఫాన్‌ ప్రభావంతో భోగాపురంలోని అల్లూరి సీతారామరాజు అంతర్జాతీయ విమానాశ్రయం నుంచి బుధవారం 40కి పైగా విమాన సర్వీసులు రద్దయ్యాయి. దట్టమైన మేఘాలు ఆవరించడంతో విమానాల టేకాఫ్‌, ల్యాండింగ్‌కు ఇబ్బందులు ఏర్పడ్డాయి. దీంతో ఢిల్లీ, ముంబై, కోల్‌కతా, చెన్నై వెళ్లాల్సిన ప్రయాణికులు వరుసగా రెండోరోజు కూడా ఇబ్బందులు ఎదుర్కొన్నారు. హైదరాబాద్‌, బెంగళూరు, విజయవాడ, తిరుపతికి నడిచే ఇండిగో, ఎయిర్‌ ఇండియా, ఎయిర్‌ ఇండియా ఎక్స్‌ప్రెస్‌ విమాన సర్వీసులతో పాటు సింగపూర్‌కు వెళ్లే స్కూట్‌ ఎయిర్‌లైన్స్‌, అబుదాబీ సర్వీసులు కూడా ప్రభావితమయ్యాయి. గురువారం వాతావరణ పరిస్థితులను పరిశీలించిన తర్వాత విమాన సర్వీసుల నిర్వహణపై నిర్ణయం తీసుకుంటామని ఏపీ ఎయిర్‌ ట్రావెల్స్‌ అసోసియేషన్‌ ప్రతినిధి తెలిపారు.

మరోవైపు, తుఫాన్‌ ప్రభావంతో గురువారం పలు రైళ్లను రద్దు చేస్తున్నట్లు రైల్వే అధికారులు ప్రకటించారు. భువనేశ్వర్‌–సికింద్రాబాద్‌ విశాఖ ఎక్స్‌ప్రెస్‌ (17015), హౌరా–సికింద్రాబాద్‌ ఫలక్‌నూమా ఎక్స్‌ప్రెస్‌ (12703), విశాఖపట్నం–పార్వతీపురం ప్రత్యేక రైలు (07268), విశాఖపట్నం–రాజమండ్రి మెము రైలు (67286) రద్దయ్యాయి. విమానాలు, రైళ్ల రద్దుతో ప్రయాణికుల ప్రయాణ ప్రణాళికలకు అంతరాయం ఏర్పడింది. ప్రయాణానికి బయలుదేరే ముందు సంబంధిత విమానయాన సంస్థలు, రైల్వే అధికారుల నుంచి తాజా సమాచారాన్ని తెలుసుకోవాలని సూచించారు.