ఏపీ, ఒడిశాలో భారీ వర్షాలు...

బంగాళాఖాతంలో కొనసాగుతున్న తీవ్ర వాయుగుండం ప్రభావంతో ఆంధ్రప్రదేశ్‌, ఒడిశాలో పలు ప్రాంతాల్లో భారీ నుంచి అతి భారీ వర్షాలు కురుస్తున్నాయి. భారత వాతావరణ శాఖ ప్రకారం ఈ వ్యవస్థ పశ్చిమ వాయవ్య దిశగా కదులుతూ సెప్టెంబర్‌ 23 రాత్రికి ఉత్తర ఆంధ్రప్రదేశ్‌-దక్షిణ ఒడిశా తీరాల మధ్య, కళింగపట్నం సమీపంలో తీరం దాటే అవకాశం ఉంది. దీంతో తీర ప్రాంతాల్లో బలమైన ఈదురుగాలులు, సముద్రంలో అలజడి నెలకొనే అవకాశం ఉందని ఐఎండీ హెచ్చరించింది.

భారీ వర్షాల కారణంగా పలు ప్రాంతాల్లో వాగులు, నదులు ఉద్ధృతంగా ప్రవహిస్తున్నాయి. శ్రీకాకుళంలోని వంశధార, బాహుదా నదులతో పాటు కర్నూలు ప్రాంతంలోని వేదవతి, తుంగభద్ర నదుల్లో వరద ఉద్ధృతి కనిపించింది. అల్లూరి జిల్లాలో గెడ్డలు, జలపాతాలు పొంగిపొర్లుతుండగా, పలు చోట్ల వంతెనలు, కల్వర్టులపై నుంచి వరద నీరు ప్రవహిస్తోంది. కొన్ని ప్రాంతాల్లో రాకపోకలకు అంతరాయం ఏర్పడగా, ఈదురుగాలులకు చెట్లు, విద్యుత్‌ స్తంభాలు నేలకొరిగాయి. ప్రభావిత తీర ప్రాంతాల్లో మత్స్యకారులు సముద్రంలోకి వెళ్లొద్దని ఐఎండీ సూచించింది.