వర్షం కోసం గాడిదలకు పెళ్లి

వర్షాలు కురవకపోవడంతో కర్ణాటకలోని బెళగావి జిల్లా మూడలగి తాలూకా మున్యాళ గ్రామస్తులు గాడిదలకు వివాహం జరిపించారు. మగ గాడిదకు కాంతేశ్, ఆడ గాడిదకు కస్తూరి అని పేర్లు పెట్టి శాస్తోక్తంగా పెళ్లి నిర్వహించారు. పంటలు ఎండిపోతున్న పరిస్థితుల్లో వర్షాల కోసం పూర్వీకుల నుంచి వస్తున్న ఆచారాన్ని కొనసాగించారు.

ఈ కార్యక్రమంలో గ్రామస్తులు పెద్ద సంఖ్యలో పాల్గొని అతిథులకు విందు భోజనం ఏర్పాటు చేశారు. వర్షాభావం వల్ల వ్యవసాయం తీవ్రంగా దెబ్బతిన్నదని గ్రామ పెద్దలు తెలిపారు. ఈ నేపథ్యంలో సంప్రదాయ విశ్వాసంతో గాడిదలకు వివాహం జరిపించడం ద్వారా వర్షాలు కురవాలని ఆకాంక్షించారు.