ఏలూరులో పోలింగ్ ఏర్పాట్లపై ఎన్నికల పరిశీలకుడి సమీక్ష..

ఏలూరు జిల్లాలో స్థానిక సంస్థల ఎన్నికలను నిష్పక్షపాతంగా, ప్రశాంత వాతావరణంలో నిర్వహించాలని ఎన్నికల సాధారణ పరిశీలకుడు, రాష్ట్ర కార్మిక శాఖ కార్యదర్శి మిరియాల వెంకట శేషగిరిబాబు అధికారులను ఆదేశించారు. శుక్రవారం కలెక్టరేట్‌లోని గౌతమీ సమావేశ మందిరంలో జిల్లా కలెక్టర్ కె. వెట్రిసెల్వి, జాయింట్ కలెక్టర్ డాక్టర్ ఎం.జె. అభిషేక్ గౌడతో కలిసి ఏలూరు నగరపాలక సంస్థ, నూజివీడు, జంగారెడ్డిగూడెం పురపాలక సంఘాల పోలింగ్ ఏర్పాట్లపై సమీక్ష నిర్వహించారు.

ఈ సందర్భంగా ఎన్నికల సిబ్బంది ఎలాంటి పక్షపాతం, నిర్లక్ష్యానికి తావులేకుండా బాధ్యతాయుతంగా విధులు నిర్వర్తించాలని శేషగిరిబాబు సూచించారు. ప్రజలు స్వేచ్ఛగా ఓటు వేసేందుకు అనువైన వాతావరణం కల్పించాలని, పోలింగ్‌కు 48 గంటల ముందు నుంచి ప్రచారాలు, సభలు జరగకుండా కట్టుదిట్టమైన నిఘా ఏర్పాటు చేయాలని ఆదేశించారు. మూడు పట్టణ స్థానిక సంస్థల్లో పోలింగ్ ఏర్పాట్లు పూర్తయ్యాయని కలెక్టర్ వెట్రిసెల్వి తెలిపారు. పోలింగ్ ప్రాంతాల్లో బయటి వ్యక్తులు బస చేయకుండా చర్యలు తీసుకుంటున్నామని, శనివారం నాటికి సిబ్బంది, ఎన్నికల సామగ్రిని వాహనాల్లో తరలిస్తామని చెప్పారు. సమస్యాత్మక, అతి సమస్యాత్మక పోలింగ్ కేంద్రాల వద్ద పటిష్ఠ భద్రత ఏర్పాటు చేశామని, సిబ్బందికి పూర్తి స్థాయిలో శిక్షణ ఇచ్చామని వివరించారు. ఈ సమావేశంలో వివిధ శాఖల అధికారులు పాల్గొన్నారు.