సింగరేణి కార్మికులకు దీపావళి బోనస్..

సింగరేణి కార్మికులకు తెలంగాణ ప్రభుత్వం దీపావళి కానుక ప్రకటించింది. నవంబర్ 5వ తేదీన పెర్ఫార్మెన్స్ లింక్డ్ రివార్డ్ బోనస్‌ను చెల్లించాలని ఉప ముఖ్యమంత్రి, ఇంధన శాఖ మంత్రి భట్టి విక్రమార్క సింగరేణి యాజమాన్యాన్ని ఆదేశించారు. ఈ మేరకు శుక్రవారం విడుదల చేసిన ప్రకటనలో కార్మికులకు దీపావళి శుభాకాంక్షలు తెలిపారు. మొత్తం రూ.419 కోట్లను బోనస్‌గా చెల్లించనుండగా, అర్హులైన ఒక్కో కార్మికుడికి గరిష్ఠంగా రూ.1,10,250 అందనుంది. ఈ నిర్ణయంతో సుమారు 38 వేల మంది కార్మికులకు ప్రయోజనం కలగనుంది. బోనస్ మొత్తాన్ని నవంబర్ 5న కార్మికుల బ్యాంకు ఖాతాల్లో జమ చేసేందుకు అవసరమైన ఏర్పాట్లు చేయాలని సింగరేణి సీఎండీ డాక్టర్ బుద్ధప్రకాష్ జ్యోతి సంబంధిత అధికారులను ఆదేశించారు.

ఈ బోనస్ నేషనల్ కోల్ వేజ్ అగ్రిమెంట్ (ఎన్‌సీడబ్ల్యూఏ) పరిధిలోని ఉద్యోగులకు మాత్రమే వర్తిస్తుంది. అధికారులకు వర్తించదు. గత ఆర్థిక సంవత్సరంలో భూగర్భ గనుల్లో 190 పని దినాలు, ఓపెన్‌కాస్ట్, సర్ఫేస్ విభాగాల్లో 240 పని దినాలు పూర్తి చేసిన కార్మికులకు పూర్తి బోనస్ అందుతుంది. అంతకంటే తక్కువ రోజులు పనిచేసిన వారికి పని దినాల ఆధారంగా నిష్పత్తి ప్రకారం చెల్లిస్తారు. అయితే బోనస్ పొందేందుకు కనీసం 30 పని దినాలు పూర్తి చేసి ఉండాలి. ఇటీవల దసరా లాభాల వాటా బోనస్‌గా సుమారు రూ.600 కోట్లు చెల్లించిన సింగరేణి, ఇప్పుడు దీపావళి బోనస్‌గా మరో రూ.419 కోట్లు అందించనుంది. కార్మికులు ఈ మొత్తాన్ని కుటుంబ అవసరాలకు వినియోగించుకోవడంతో పాటు వీలైనంత పొదుపు చేయాలని సీఎండీ సూచించారు. పండుగల స్ఫూర్తితో ఉత్సాహంగా పనిచేస్తూ నిర్దేశించిన ఉత్పత్తి లక్ష్యాలను సాధించాలని కోరారు.