కేసీఆర్ ఫామ్‌హౌస్ సమీపంలో భూముల సర్వే ముమ్మరం

సిద్దిపేట జిల్లా మర్కుక్ మండలం ఎర్రవల్లి గ్రామంలో భూముల సర్వే కొనసాగుతోంది. సర్వే నంబర్ 325లోని సుమారు 388.05 ఎకరాల భూములకు అధికారులు ఇప్పటికే హద్దులు గుర్తించారు. ప్రస్తుతం రైతువారీగా భూముల పరిశీలన చేపడుతున్నారు. ఇందులో భాగంగా సుమారు 100 మంది రైతులకు నోటీసులు జారీ చేసి, భూములకు సంబంధించిన హక్కు, స్వాధీనానికి ఆధారాలను తీసుకుని హాజరు కావాలని అధికారులు ఆదేశించారు.

మాజీ సీఎం కేసీఆర్ ఫామ్‌హౌస్ ఉన్న ఎర్రవల్లి ప్రాంతంలో భూముల రికార్డుల పరిశీలనలో భాగంగా ఈ సర్వే జరుగుతోంది. భూములు రైతుల చేతికి ఎలా వచ్చాయి, ప్రస్తుతం వారి వద్ద ఉన్న భూమికి సంబంధించిన రికార్డులు సరిపోతున్నాయా అనే అంశాలను అధికారులు పరిశీలిస్తున్నారు. అన్ని సంబంధిత భూముల రైతులకు దశలవారీగా నోటీసులు ఇచ్చే ప్రక్రియ కొనసాగుతున్నట్లు సమాచారం. ఇదే సమయంలో సర్వే నంబర్ 325లోని కొంత భూమిపై శివారు వెంకటాపూర్ రైతులు కూడా హక్కులు కోరుతున్నారు.