భారత్‌లో గ్లోబల్‌ సెంటర్లకు విదేశీ సంస్థల క్యూ..

విదేశీ బ్యాంకింగ్‌, ఆర్థిక సేవలు, బీమా (BFSI) సంస్థలు గ్లోబల్‌ కేపబిలిటీ సెంటర్ల (GCC) ఏర్పాటుకు భారత్‌ను ప్రాధాన్య గమ్యస్థానంగా ఎంచుకుంటున్నాయి. దీంతో దేశంలోని వాణిజ్య కార్యాలయ స్థలాలకు డిమాండ్‌ పెరుగుతోంది. రియల్‌ ఎస్టేట్‌ కన్సల్టెంట్‌ నైట్‌ఫ్రాంక్‌ ఇండియా ప్రకారం.. ఈ ఏడాది జనవరి-జూన్‌ కాలంలో విదేశీ BFSI సంస్థలు రికార్డు స్థాయిలో 73.2 లక్షల చదరపు అడుగుల కార్యాలయ స్థలాన్ని లీజుకు తీసుకున్నాయి. ఆర్థిక సేవలకు సంబంధించిన కార్యకలాపాలు, సాంకేతిక విభాగాలు, ఇతర గ్లోబల్‌ విధుల కోసం భారత్‌ కీలక కేంద్రంగా మారుతున్న నేపథ్యంలో ఈ డిమాండ్‌ పెరుగుతున్నట్లు తెలుస్తోంది.

మరోవైపు, విదేశీ ఐటీ-ఐటీఈఎస్‌ సంస్థలు GCCల ఏర్పాటుకు అద్దెకు తీసుకున్న కార్యాలయ స్థలంలో తగ్గుదల నమోదైంది. ఈ ఏడాది ప్రథమార్ధంలో ఈ సంస్థలు 41.3 లక్షల చదరపు అడుగుల స్థలాన్ని మాత్రమే లీజుకు తీసుకున్నాయి. ఏడాది క్రితం ఇదే కాలంలో ఈ పరిమాణం 57.1 లక్షల చదరపు అడుగులుగా ఉంది. దీంతో ఐటీ-ఐటీఈఎస్‌ రంగంతో పోలిస్తే BFSI సంస్థల నుంచి GCCలకు సంబంధించిన కార్యాలయ స్థల డిమాండ్‌ గణనీయంగా పెరిగినట్లు గణాంకాలు సూచిస్తున్నాయి.