వలసదారులకు గ్రీన్‌కార్డు.. డెమోక్రాట్ల కొత్త ప్రతిపాదన

అమెరికాలో చాలాకాలంగా నివసిస్తున్న వలసదారులను రక్షించేందుకు డెమోక్రటిక్ పార్టీ కొత్త చట్టపరమైన ప్రతిపాదనను తీసుకొచ్చింది. ట్రంప్ ప్రభుత్వ కఠిన విధానాల కారణంగా ఎదురవుతున్న సమస్యలకు పరిష్కారంగా 1929 నాటి పాత వలస చట్టాన్ని సవరించి, వారికి చట్టబద్ధ శాశ్వత నివాస హోదా (గ్రీన్‌కార్డు) కల్పించాలని సూచించింది. ఈ చర్య అమెరికా ఆర్థిక వ్యవస్థకు తోడ్పడుతున్న వలసదారులకు భరోసా కల్పించడమే లక్ష్యంగా ఉంది.

కాలిఫోర్నియా సెనేటర్ అలెక్స్ పడిల్లా గత ఏడాది ప్రతిపాదించిన బిల్లును మళ్లీ ప్రవేశపెట్టారు. హెచ్1బీ వీసాదారులతో సహా ఏడేళ్ల పాటు అమెరికాలో నివసించినవారికి గ్రీన్‌కార్డు కోసం దరఖాస్తు చేసుకునే అవకాశం కల్పించాలని సూచించారు. వలసదారులపై పెరుగుతున్న ఒత్తిడిని తగ్గించాల్సిన అవసరం ఉందని ఆయన పేర్కొన్నారు. ఈ బిల్లు వలస, జాతీయత చట్టంలోని సెక్షన్ 249 సవరణను ప్రతిపాదిస్తోంది. దీనికి పలువురు డెమోక్రటిక్ నేతలు, 30కు పైగా సంస్థలు మద్దతు తెలిపారు. ప్రస్తుతం సుమారు 80 లక్షల మంది గ్రీన్‌కార్డుల కోసం ఎదురు చూస్తున్నారు.