తెలుగు రాష్ట్రాల్లో భారీ వర్ష బీభత్సం..

బంగాళాఖాతంలో ఏర్పడిన తీవ్ర వాయుగుండం ప్రభావంతో ఆంధ్రప్రదేశ్‌, తెలంగాణలో భారీ వర్షాలు కురుస్తున్నాయి. ఒడిశాలోని పలు జిల్లాల్లోనూ వర్ష ప్రభావం కనిపిస్తోంది. భారీ వర్షాలకు వాగులు, వంకలు, నదులు ఉప్పొంగి ప్రవహిస్తుండటంతో రహదారులు జలమయమయ్యాయి. పలు ప్రాంతాలకు రాకపోకలు అంతరాయం కలగగా, బలమైన ఈదురుగాలులకు చెట్లు, విద్యుత్‌ స్తంభాలు నేలకొరిగాయి.

తెలంగాణలో సిద్ధిపేట, ఖమ్మం, నల్గొండ, భద్రాద్రి కొత్తగూడెం జిల్లాల్లో వరద పరిస్థితులు కనిపించగా.. ఏపీలో శ్రీకాకుళం, విశాఖపట్నం, అల్లూరి సీతారామరాజు, కాకినాడ, ఎన్టీఆర్‌, కృష్ణా జిల్లాల్లోనూ వాగులు, నదులు, జలాశయాలు ఉప్పొంగుతున్నాయి. పలు రహదారులు, వంతెనలపై నుంచి వరద నీరు ప్రవహిస్తోంది. కాకినాడ జిల్లాలో ఆర్టీసీ బస్సు బురదలో కూరుకుపోగా, కొండవాగు ఉద్ధృతికి ఓ కారు కొట్టుకుపోయింది. సింహాచలం మెట్ల మార్గంలోనూ వరద ప్రవాహం ఉధృతంగా కనిపించింది.