‘రామాయణ’ పైరసీపై చిత్ర బృందం తీవ్ర హెచ్చరిక

నితేశ్ తివారీ దర్శకత్వంలో తెరకెక్కిన ప్రతిష్ఠాత్మక చిత్రం ‘రామాయణ’పై పైరసీ బెడదను అరికట్టేందుకు చిత్ర బృందం కఠిన హెచ్చరికలు జారీ చేసింది. థియేటర్లలో సినిమాను రహస్యంగా రికార్డు చేసి, ఆ వీడియోలను ఆన్‌లైన్‌లో అప్‌లోడ్ చేయడం, ఇతరులకు షేర్ చేయడంపై తీవ్రంగా స్పందించింది. ఈ నేపథ్యంలో బాంబే హైకోర్టు ఇటీవల జారీ చేసిన ఆదేశాలను ప్రస్తావిస్తూ చిత్ర బృందం తాజాగా లీగల్ నోటీసు విడుదల చేసింది.

అనుమతి లేకుండా సినిమా ఫుటేజ్‌ను రికార్డు చేయడం, అప్‌లోడ్ చేయడం లేదా ఇతరులకు పంపించడం చట్టరీత్యా నేరమని, ఇది కోర్టు ధిక్కరణకు కూడా దారితీయవచ్చని నోటీసులో పేర్కొంది. ఇప్పటికే ఎవరైనా ఇలాంటి వీడియోలను ఆన్‌లైన్‌లో పోస్ట్ చేసి ఉంటే వెంటనే తొలగించాలని హెచ్చరించింది. నిబంధనలు ఉల్లంఘించిన వారిపై ముందస్తు నోటీసులు ఇవ్వకుండానే క్రిమినల్, సివిల్, కోర్టు ధిక్కరణ చర్యలు చేపడతామని స్పష్టం చేసింది.