కోటి మంది మహిళలను కోటీశ్వరులుగా తీర్చిదిద్దడమే లక్ష్యం.. సీఎం రేవంత్‌రెడ్డి

లగచర్ల ఇండస్ట్రియల్ హబ్‌లో మహిళా స్వయం సహాయక సంఘాల సభ్యులతో ముఖ్యమంత్రి రేవంత్‌రెడ్డి ముఖాముఖి కార్యక్రమం నిర్వహించారు. దీపావళి పండుగ ఉన్నప్పటికీ తనకు పుట్టినరోజు శుభాకాంక్షలు తెలిపేందుకు వచ్చిన మహిళలకు ఆయన కృతజ్ఞతలు తెలిపారు. మహిళలే తన కుటుంబమని, వారి ఆశీర్వాదంతోనే ఈ స్థాయికి ఎదిగానని పేర్కొన్నారు. ప్రస్తుతం 70 లక్షల మంది మహిళలు స్వయం సహాయక సంఘాల్లో సభ్యులుగా ఉన్నారని, 2034 నాటికి ఈ సంఖ్యను కోటికి చేర్చి, కోటి మంది మహిళలను కోటీశ్వరులుగా తీర్చిదిద్దడమే తమ ప్రభుత్వ లక్ష్యమని ప్రకటించారు. మహిళలను కేవలం లబ్ధిదారులుగా కాకుండా వ్యాపారవేత్తలు, పారిశ్రామికవేత్తలుగా ఎదిగేలా ప్రోత్సహిస్తామని చెప్పారు.

మహిళల ఆర్థిక సాధికారత కోసం పలు కార్యక్రమాలు చేపట్టామని సీఎం వివరించారు. గత 34 నెలల్లో మహిళలకు బ్యాంకు లింకేజీ ద్వారా రూ.79 వేల కోట్ల రుణాలు అందించామని, ప్రభుత్వ పాఠశాలల విద్యార్థుల యూనిఫామ్ కుట్టుపని, పెట్రోల్ బంకులు, సోలార్ విద్యుత్ ఉత్పత్తి, ఇందిరమ్మ క్యాంటీన్ల నిర్వహణ వంటి అవకాశాలను మహిళలకు కల్పించామని తెలిపారు. ఈ కార్యక్రమాల ద్వారా మహిళలు ఏటా రూ.15 కోట్ల నుంచి రూ.20 కోట్ల వరకు వ్యాపారం చేస్తున్నారని పేర్కొన్నారు. కొత్తగా మంజూరు చేసిన 4.5 లక్షల పెన్షన్లలో 3.5 లక్షలు ఒంటరి మహిళలు, వితంతువులకు కేటాయించినట్లు చెప్పారు. ఇందిరమ్మ ఇళ్లు, 200 యూనిట్ల ఉచిత విద్యుత్, ఉచిత ఆర్టీసీ ప్రయాణం, సన్నబియ్యం పంపిణీ వంటి పథకాలను ప్రస్తావిస్తూ మహిళల అభ్యున్నతికి ప్రభుత్వం అండగా ఉంటుందని హామీ ఇచ్చారు. మహిళలు తమ పిల్లలకు ఉన్నత విద్య అందించాలని, ఆర్థికంగా నిలదొక్కుకోవాలని పిలుపునిచ్చారు. ఈ సందర్భంగా బీఆర్‌ఎస్‌ నేత కేటీఆర్‌పై కూడా విమర్శలు చేశారు. ఈ కార్యక్రమంలో స్పీకర్ గడ్డం ప్రసాద్ కుమార్, మంత్రులు సీతక్క, దామోదర రాజనర్సింహ, తుమ్మల నాగేశ్వరరావు, వాకిటి శ్రీహరి తదితరులు పాల్గొన్నారు.