హిందీ టీవీ నటుడు అనుజ్ ఠాకూర్ కన్నుమూత

బుల్లితెరపై పలు పాత్రలతో ప్రేక్షకులను అలరించిన యువ నటుడు అనుజ్ ఠాకూర్ (33) కన్నుమూశారు. హిందీ టెలివిజన్ సీరియల్స్‌తో గుర్తింపు తెచ్చుకున్న ఆయన అక్టోబర్ 27న నిద్రలోనే తుదిశ్వాస విడిచారు. ఈ విషాద ఘటన ఆలస్యంగా వెలుగులోకి రావడంతో టీవీ పరిశ్రమలో విషాదం నెలకొంది. అనుజ్ మరణవార్తను ఆయన స్నేహితుడు, కాస్టింగ్ డైరెక్టర్, సహనటుడు రూపేష్ సోనార్ అక్టోబర్ 30న సోషల్ మీడియా వేదికగా వెల్లడించారు. అనుజ్ తనకు స్నేహితుడే కాకుండా సొంత తమ్ముడిలాంటి వాడని పేర్కొంటూ భావోద్వేగ పోస్ట్ పెట్టారు. ఇద్దరూ కలిసి చేయాల్సిన ప్రాజెక్టులు ఎన్నో ఉన్నాయని, ఇంత చిన్న వయసులోనే అతడు దూరమవడం బాధాకరమని ఆవేదన వ్యక్తం చేశారు.

రూపేష్ తెలిపిన వివరాల ప్రకారం.. అనుజ్ ప్రతిరోజూ ఉదయం 4:30 గంటలకే నిద్రలేచి జిమ్, జాగింగ్‌తో ఆరోగ్యంపై ప్రత్యేక శ్రద్ధ చూపేవారు. అయితే ఘటన జరిగిన రోజు అలారం మోగినా ఆయన నిద్రలేవలేదు. అనుమానం వచ్చిన తల్లి గదిలోకి వెళ్లి చూడగా అప్పటికే ఆయన మరణించారు. నిద్రలో ఫిట్స్ రావడంతోనే అనుజ్ మృతి చెందినట్లు కుటుంబ సభ్యులు తనకు తెలిపారని రూపేష్ వెల్లడించారు. 2007–08లో డిస్నీ ఛానెల్‌లో ప్రసారమైన ‘ధూమ్ మచావో ధూమ్’తో నటనను ప్రారంభించిన అనుజ్.. ‘బంధన్ సాత్ జన్మో కా’, ‘బీంద్ బనూంగా ఘోడి చఢూంగా’, ‘మహిసాగర్’ వంటి సీరియల్స్‌లో నటించారు. ముఖ్యంగా ‘బీంద్ బనూంగా ఘోడి చఢూంగా’లో జై పొద్దార్ పాత్రతో మంచి గుర్తింపు పొందారు. ఇటీవలే మళ్లీ నటనలో బిజీ కావాలని ప్రయత్నిస్తున్న సమయంలో ఆయన మృతి చెందడం కుటుంబ సభ్యులు, స్నేహితులు, అభిమానులను కలచివేసింది.