హెచ్‌ఎండబ్ల్యూఎస్‌ఎస్‌బీకి 37 ఏళ్లు.. నీటి సంరక్షణకు సీఎం రేవంత్ రెడ్డి పిలుపు

హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (HMWSSB) 37వ ఆవిర్భావ దినోత్సవం సందర్భంగా తెలంగాణ ముఖ్యమంత్రి ఎ. రేవంత్ రెడ్డి బోర్డు అధికారులు, ఉద్యోగులు, సిబ్బంది, వారి కుటుంబ సభ్యులకు శుభాకాంక్షలు తెలిపారు. గత 37 ఏళ్లుగా హైదరాబాద్ ప్రజలకు సురక్షితమైన తాగునీటిని అందించడంతో పాటు మురుగునీటి నిర్వహణలో బోర్డు కీలక పాత్ర పోషించిందని ప్రశంసించారు. నగర అభివృద్ధి, ప్రజారోగ్యం, సమగ్ర ప్రగతికి బోర్డు అందించిన సేవలను అభినందించారు. వేగంగా విస్తరిస్తున్న హైదరాబాద్‌లో నీటి భద్రతకు, జల వనరుల సుస్థిర నిర్వహణకు ప్రాధాన్యత ఇవ్వాలని సూచించారు. ఎల్‌నినో ప్రభావం, మారుతున్న పరిస్థితులను దృష్టిలో ఉంచుకుని మంచినీటి వనరులను పరిరక్షించేందుకు ముందస్తు చర్యలు చేపట్టాలని, గృహావసరాలకు సంబంధం లేని పనులకు తాగునీటి వినియోగాన్ని తగ్గించాలని కోరారు.

‘డయల్ గ్రీన్ ట్యాంకర్ – గ్రీన్ ట్యాంకర్ ఆపరేషన్స్’ కార్యక్రమాన్ని ప్రారంభించడాన్ని ముఖ్యమంత్రి స్వాగతించారు. సుస్థిర నీటి నిర్వహణ దిశగా ఇది సరైన సమయంలో చేపట్టిన కీలకమైన చర్యగా అభివర్ణించారు. ప్రభుత్వ శాఖలు, పరిశ్రమలు, నిర్మాణ సంస్థలు, వాణిజ్య సంస్థలు తోటల పెంపకం, నిర్మాణ పనులు, పారిశ్రామిక అవసరాల కోసం శుద్ధి చేసిన మురుగునీటిని విస్తృతంగా వినియోగించాలని సూచించారు. దీనివల్ల మంచినీటిపై ఆధారపడటం తగ్గి, గృహావసరాలకు నీరు అందుబాటులో ఉంటుందని పేర్కొన్నారు. నీటి సంరక్షణను ప్రతి ఒక్కరూ సమిష్టి బాధ్యతగా స్వీకరించాలని, నీటి భద్రత కలిగిన సుస్థిర హైదరాబాద్ నిర్మాణానికి సహకరించాలని ప్రజలకు పిలుపునిచ్చారు. కోర్ అర్బన్ రీజియన్ (CURE) ప్రజలకు మరింత మెరుగైన సేవలు అందిస్తూ HMWSSB భవిష్యత్తులో మరిన్ని విజయాలు సాధించాలని ఆకాంక్షించారు.