ఇంధన సంక్షోభం వేళ ఇరాన్‌కు జాక్‌పాట్‌..

అమెరికా ఆంక్షలు, ఆర్థిక ఒత్తిళ్ల మధ్య ఇంధన రంగంలో సవాళ్లు ఎదుర్కొంటున్న ఇరాన్‌కు కీలక ఊరట లభించింది. దక్షిణ ఫార్స్‌ ప్రావిన్స్‌లో 7.5 ట్రిలియన్‌ ఘనపుటడుగులకు పైగా సహజవాయు నిల్వలను గుర్తించినట్లు ఆ దేశ చమురు శాఖ మంత్రి మొహ్సెన్‌ పక్నెజాద్‌ వెల్లడించారు. కొత్తగా గుర్తించిన నిల్వల్లో 72–73 శాతం వరకు గ్యాస్‌ను వెలికితీయవచ్చని అంచనా వేస్తున్నారు. అంటే దాదాపు 5.7 ట్రిలియన్‌ ఘనపుటడుగుల గ్యాస్‌ను వాణిజ్య అవసరాలకు వినియోగించే అవకాశం ఉంది.

ఈ ఆవిష్కరణలో మరో ప్రత్యేకత ఏమిటంటే.. ఇది ‘స్వీట్‌ నేచురల్‌ గ్యాస్‌’గా పేర్కొంటున్నారు. ఇందులో హైడ్రోజన్‌ సల్ఫైడ్‌ వంటి మలినాలు తక్కువగా ఉండటంతో శుద్ధి, ఉత్పత్తి వ్యయాలు తగ్గే అవకాశం ఉంది. ఇప్పటికే దాదాపు 34 ట్రిలియన్‌ క్యూబిక్‌ మీటర్ల సహజవాయు నిల్వలతో రష్యా తర్వాత ప్రపంచంలో రెండో స్థానంలో ఉన్న ఇరాన్‌.. తాజా ఆవిష్కరణతో తన ఇంధన సంపదను మరింత పెంచుకోనుంది. అయితే కొత్త క్షేత్రాన్ని అభివృద్ధి చేసేందుకు భారీ పెట్టుబడులు, ఆధునిక సాంకేతిక పరిజ్ఞానం, మౌలిక వసతులు అవసరం. యుద్ధ పరిస్థితులు, అమెరికా ఆంక్షలు, అంతర్జాతీయ ఆర్థిక పరిమితుల నేపథ్యంలో వీటిని సమకూర్చుకోవడం ఇరాన్‌కు సవాలుగా మారవచ్చు. అలాగే ఆంక్షల కారణంగా ఈ గ్యాస్‌ను అంతర్జాతీయ మార్కెట్లకు ఎగుమతి చేసి పూర్తిస్థాయిలో లాభాలను ఆర్జించడం కూడా సులభం కాకపోవచ్చు.