పవన్ కళ్యాణ్ ఆరోగ్యంపై కోకిలాబెన్ ఆస్పత్రి హెల్త్ బులెటిన్..

ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ఆరోగ్య పరిస్థితిపై ముంబైలోని కోకిలాబెన్ ధీరూభాయ్ అంబానీ ఆస్పత్రి వైద్యులు హెల్త్ బులెటిన్ విడుదల చేశారు. కుడి భుజంలోని రొటేటర్ కఫ్‌కు తీవ్ర గాయం కావడంతో రెండు ప్రధాన టెండన్లు చిట్లినట్లు వైద్య పరీక్షల్లో నిర్ధారణ అయిందని తెలిపారు. దీంతో నిన్న విజయవంతంగా శస్త్రచికిత్స నిర్వహించినట్లు వెల్లడించారు.

శస్త్రచికిత్స అనంతరం పవన్ కళ్యాణ్ ఆరోగ్యం ప్రస్తుతం నిలకడగా ఉందని వైద్యులు తెలిపారు. పూర్తి కోలుకునే వరకు కొంతకాలం విశ్రాంతి తీసుకోవాలని, అనంతరం వైద్యుల పర్యవేక్షణలో షోల్డర్ రిహాబిలిటేషన్ ప్రారంభించాలని సూచించారు. చికిత్సకు ఆయన సానుకూలంగా స్పందిస్తున్నారని ఆస్పత్రి వర్గాలు పేర్కొన్నాయి.