దక్షిణ భారతంలో తొలి ల్యాంబోర్ఘిని టెమెరారియో డెలివరీ..

ఆటోమొబిలి ల్యాంబోర్ఘిని ఇండియా దేశంలో కొత్త ల్యాంబోర్ఘిని టెమెరారియో హైబ్రిడ్ సూపర్‌కార్ డెలివరీలను అధికారికంగా ప్రారంభించింది. భారత్‌లోని తొలి యూనిట్లలో ఒకటి, అలాగే దక్షిణ భారతంలో మొదటి టెమెరారియోను ఆకర్షణీయమైన నెరో నాక్టిస్ (Nero Noctis) గ్లోస్ బ్లాక్ కలర్‌లో కస్టమర్‌కు అందజేశారు. లెజెండరీ హురాకాన్కు వారసుడిగా వచ్చిన ఈ సూపర్‌కార్ ఎక్స్‌షోరూమ్ ధర ₹6 కోట్లు. బెంగళూరు, హైదరాబాద్ వంటి నగరాల్లో రిజిస్ట్రేషన్, ఇన్సూరెన్స్, ప్రత్యేక కస్టమైజేషన్‌లతో కలిపి దీని ఆన్-రోడ్ ధర సుమారు ₹7.3 కోట్ల నుంచి ₹7.5 కోట్ల వరకు ఉండే అవకాశం ఉంది.

ఈ సూపర్‌కార్‌లో కొత్తగా అభివృద్ధి చేసిన 4.0 లీటర్ ట్విన్-టర్బో V8 ఇంజిన్తో పాటు మూడు ఎలక్ట్రిక్ మోటార్లు పనిచేస్తాయి. ఈ ప్లగ్-ఇన్ హైబ్రిడ్ పవర్‌ట్రైన్ కలిపి 907 బీహెచ్‌పీ శక్తిని ఉత్పత్తి చేస్తుంది. దీంతో కారు 0 నుంచి 100 కిమీ వేగాన్ని కేవలం 2.7 సెకన్లలో అందుకోగా, గరిష్టంగా 343 కిమీ/గంట వేగంతో దూసుకెళ్లగలదు. అత్యాధునిక సాంకేతికత, అసాధారణ పనితీరుతో టెమెరారియో ల్యాంబోర్ఘిని హైబ్రిడ్ సూపర్‌కార్‌లలో కొత్త ప్రమాణాలను నెలకొల్పుతోంది.