

అమెరికాలో చదువుకుంటున్న విదేశీ విద్యార్థులు, అక్కడ పనిచేస్తున్న జర్నలిస్టులకు భారీ ఊరట లభించింది. వారి నివాస గడువును పరిమితం చేస్తూ ట్రంప్ ప్రభుత్వం తీసుకొచ్చిన కొత్త నిబంధనను అమెరికా ఫెడరల్ కోర్టు కొట్టివేసింది. ఎఫ్-1, జె-1, ఐ వీసాదారుల అమెరికా నివాస కాలపరిమితిని కుదిస్తూ హోంల్యాండ్ సెక్యూరిటీ విభాగం 2026లో ఈ నిబంధనను తీసుకొచ్చింది. దీనిపై సెప్టెంబర్ 14నే కోర్టు ఇంజంక్షన్ ఉత్తర్వులు జారీ చేసింది. తాజాగా ఈ నిబంధన ఏకపక్షంగా, సహేతుకత లేకుండా ఉందని, అధికార దుర్వినియోగానికి పాల్పడినట్లుగా ఉందని న్యాయమూర్తి ఎఫ్. డెన్నిస్ స్లేయర్ వ్యాఖ్యానించారు. విదేశీ విద్యార్థులకు అవకాశాలు కల్పించడం కాంగ్రెస్ బాధ్యతని, ఆ అధికారాన్ని హోంల్యాండ్ సెక్యూరిటీ విభాగం అడ్డుకోలేదని అభిప్రాయపడ్డారు.
ఈ తీర్పుతో ఎఫ్-1 వీసాలపై చదువుకుంటున్న విద్యార్థులు, జె-1 వీసాలపై పరిశోధనలు చేస్తున్నవారు, ప్రొఫెసర్లు, ఐ వీసాలపై పనిచేస్తున్న విదేశీ జర్నలిస్టులకు ఊరట లభించనుంది. పాత నిబంధనల ప్రకారం ఎఫ్, జె వీసాదారులు తమ కోర్సు లేదా పరిశోధన పూర్తయిన తర్వాత కూడా నిబంధనలకు లోబడి అమెరికాలో ఉండే అవకాశం ఉండేది. అయితే కొత్త నిబంధనల ప్రకారం విద్యార్థులు, ఎక్స్ఛేంజ్ విజిటర్ల నివాస గడువును నాలుగేళ్లకు పరిమితం చేశారు. ఆ తర్వాత ఉండాలంటే ఇమిగ్రేషన్ విభాగానికి పొడిగింపు కోసం దరఖాస్తు చేసుకోవాల్సి వచ్చేది. విదేశీ జర్నలిస్టుల నివాస గడువును ఐదేళ్ల నుంచి 240 రోజులకు, చైనా జర్నలిస్టుల విషయంలో 90 రోజులకు కుదించారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!