నేడు నితిన్ నబీన్‌తో బీజేపీ రాష్ట్రాల ఇన్‌చార్జుల కీలక భేటీ

బీజేపీ జాతీయ అధ్యక్షుడు నితిన్ నబీన్ అధ్యక్షతన నేడు ఢిల్లీలో పార్టీ రాష్ట్రాల ఇన్‌చార్జులు, సహ ఇన్‌చార్జులతో కీలక సమావేశం జరగనుంది. ఇటీవల 28 రాష్ట్రాలు, 8 కేంద్రపాలిత ప్రాంతాలకు కొత్తగా నియమించిన ఇన్‌చార్జులు, సహ ఇన్‌చార్జులు ఈ సమావేశానికి హాజరుకానున్నారు. సంస్థాగత పునర్వ్యవస్థీకరణ తర్వాత జరుగుతున్న తొలి సమగ్ర సమావేశం కావడంతో దీనికి ప్రాధాన్యం ఏర్పడింది. పార్టీ సంస్థాగత బలోపేతం, రానున్న అసెంబ్లీ ఎన్నికలకు సన్నద్ధతపై ప్రధానంగా చర్చించనున్నట్లు సమాచారం.

బీజేపీ పాలిత రాష్ట్రాల్లో ప్రభుత్వాల పనితీరును సమీక్షించడంతో పాటు కేంద్ర, రాష్ట్ర పార్టీ యూనిట్ల మధ్య సమన్వయం, భవిష్యత్ సంస్థాగత కార్యక్రమాలు, ఎన్నికల సన్నాహాలపై సమావేశంలో చర్చించనున్నట్లు పార్టీ వర్గాలు తెలిపాయి. కొత్తగా నియమించిన ఇన్‌చార్జులకు రాష్ట్రాల వారీగా బాధ్యతలు, రాబోయే కార్యక్రమాలపై మార్గదర్శకాలు ఇచ్చే అవకాశం ఉంది.