అండాల సేకరణ వ్యవహారంలో ఒయాసిస్‌ ఫెర్టిలిటీపై కేసు నమోదు

అండాల సేకరణ వ్యవహారంలో అక్రమాలు జరిగినట్లు వచ్చిన ఫిర్యాదు ఆధారంగా హైదరాబాద్‌లోని ఒయాసిస్‌ ఫెర్టిలిటీ యాజమాన్యంపై జూబ్లీహిల్స్‌ పోలీసులు కేసు నమోదు చేశారు. సద్గురు హెల్త్‌కేర్‌ సర్వీసెస్‌ ప్రైవేట్‌ లిమిటెడ్‌ డైరెక్టర్‌ డాక్టర్‌ గేదెల దుర్గారావు, బ్రోకర్లు అమిత్‌ శర్మ, నిఖత్‌ పర్వీన్‌, దీపికతో పాటు ఇతర డైరెక్టర్ల పేర్లు కేసులో ఉన్నాయి. వైద్య ఆరోగ్య శాఖ డైరెక్టర్‌ పుట్ల శ్రీనివాస్‌ ఇచ్చిన ఫిర్యాదు మేరకు ఈ చర్యలు తీసుకున్నారు. అండాల సేకరణ వ్యవహారానికి సంబంధించి డాక్టర్‌ దుర్గారావు తొమ్మిది మందితో ఒప్పందాలు చేసుకున్నట్లు అధికారులు గుర్తించినట్టు సమాచారం.

ఒక్కో దాతకు సంబంధించి బ్రోకర్లకు రూ.65 వేల వరకు చెల్లించేలా ఒప్పందాలు ఉన్నాయని ఫిర్యాదులో పేర్కొన్నారు. ఏడు కంటే తక్కువ అండాలు సేకరించినట్లయితే చెల్లింపుల్లో 50 శాతం కోత విధించడం, ఆరో రోజుకు ముందే ప్రక్రియ నిలిచిపోతే ఎలాంటి డబ్బులు చెల్లించకపోవడం వంటి నిబంధనలు ఉన్నట్లు అధికారులు తెలిపారు. 2026 జనవరి నుంచి అక్టోబరు వరకు ఆస్పత్రిలో 66 మంది దాతల వివరాలు నమోదు కాగా, 47 మందికి సంబంధించిన ఫైళ్లను మాత్రమే అధికారులకు అందించినట్లు ఆరోపణలు ఉన్నాయి. మిగిలిన వివరాలను దాచిపెట్టినట్లు ఫిర్యాదులో పేర్కొన్నారు. అవసరమైన అనుమతులు, ఒప్పందాలు లేకుండానే గచ్చిబౌలి, ఉప్పల్‌ బ్రాంచీలకు అండాలను సరఫరా చేసినట్లు కూడా ఆరోపించారు. ఈ అంశాలపై పోలీసులు దర్యాప్తు చేస్తున్నారు.