వలసదారుల తరలింపు విషయంలో అమెరికాకు పాకిస్థాన్ షాక్

అమెరికా నుంచి ఇరాన్‌, ఆఫ్ఘనిస్థాన్‌ వలసదారులను వారి స్వదేశాలకు పంపించేందుకు అధ్యక్షుడు డొనాల్డ్‌ ట్రంప్‌ ప్రభుత్వం కొత్త ప్రణాళికను రూపొందించినట్లు వార్తలు వస్తున్నాయి. ఇందులో భాగంగా పాకిస్థాన్‌ను మధ్యంతర రవాణా కేంద్రంగా ఉపయోగించుకోవాలని భావించినట్లు సమాచారం. అయితే ఈ ప్రయత్నానికి అనూహ్యంగా ఆటంకం ఎదురైంది. ఇరాన్‌ పౌరులతో అమెరికా నుంచి బయలుదేరిన విమానం కొద్దిసేపటికే తిరిగి వెనక్కి వచ్చినట్లు కథనాలు వెల్లడించాయి. వలసదారులను స్వీకరించేందుకు పాకిస్థాన్‌ నిరాకరించడమే ఇందుకు కారణమని వార్తలు రావడంతో ఈ వ్యవహారం అంతర్జాతీయంగా చర్చనీయాంశమైంది.

అమెరికా ప్రతిపాదనపై చర్చలు జరిగినట్లు పాకిస్థాన్‌ అంగీకరించినప్పటికీ, ఎలాంటి తుది ఒప్పందం కుదరలేదని స్పష్టం చేసింది. ఇరాన్‌ వలసదారులకు ట్రాన్సిట్‌ వీసాలు జారీ చేసినట్లు అమెరికా కోర్టు పత్రాల్లో ప్రస్తావన ఉన్నప్పటికీ, దీనిపై పాక్‌ ప్రభుత్వం స్పష్టత ఇవ్వలేదు. మరోవైపు, వలసదారులను బలవంతంగా స్వదేశాలకు పంపితే వారి ప్రాణాలకు ముప్పు ఏర్పడుతుందని మానవ హక్కుల సంఘాలు ఆందోళన వ్యక్తం చేస్తున్నాయి. ముఖ్యంగా ఆఫ్ఘన్‌ పౌరులను తాలిబన్ల పాలనలోకి తిరిగి పంపడం ప్రమాదకరమని హెచ్చరిస్తున్నాయి. అమెరికా కాంగ్రెస్‌కు చెందిన పలువురు సభ్యులు కూడా ఈ ప్రణాళికను వ్యతిరేకించారు. వలసదారులను హింస, వేధింపులు లేదా ప్రాణాపాయ పరిస్థితుల్లోకి నెట్టే చర్యలకు పాకిస్థాన్‌ సహకరిస్తే ఆ దేశ అధికారులపై ఆంక్షలు విధించే అవకాశం ఉందని హెచ్చరించారు.